Маңғыстауда футзалдан көктемгі маусым өтіп жатыр

Мұнайлы ауданында футзалдан әуесқой ойыншылар арасындағы алғашқы турнир 14 сәуір күні басталды. Ойыншылар 1 жарым ай бойы сайысқа түседі. Жеңімпаз екі команда ҚР жазғы чемпионатына жолдама алады, деп хабарлайды mangystaumedia.kz.

Мұнайлы аудандық футбол федерациясының президенті Ақтау Ташевтің айтуынша шараның басты мақсаты — өскелең ұрпақты спортқа баулу, алдыңғы буынды үлгі ету.

- Жалпы Федерацияның ашылғанына 4 жыл өтті. 18 жастан асқан балаларға жарыстарды қысы-жазы өткізіп жатырмыз. Бұл жолғы жарыста Қазақстанның түкпір-түкпірінен жиналған командалар бақ сынасып жатыр. Ойын қызу өтуде,-деді Ақтау Ташев.

Жарысқа 12 команда тіркеліп, 10 команда қатысып жатыр. Олардың арасында БАҚ өкілдерінен жиналған команда да бар.

- Біздің командамыз «Жағымды жаңалық» деп аталады. Тобымызда БАҚ өкілдерімен қоса кәсіби ойыншылар да бар. Алғашқы 3 турдан өттік. Үшінші турда қысқы маусымның чемпионы болған «Батыр» командасының жеңісті жолын тоқтаттық. Ең басты мақсат - аудандық жарыстардың деңгейін көтеру. Біз әрдайым ақпараттық және командалық қолдау көрсетуге әзірміз,- деді «Жағымды жаңалық» командасының президенті Нұрлан Қуанышбай.

Спорттық шара әр сенбі және жексенбі күндері Әмір-Темір спорт кешенінде өтуде. Ойын барысын you tube арнасында тікелей эфирден тамашалауға болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.