Ерекше қажеттілігі бар жаңаөзендік шабандоздар Астана кубогында жүлдегер атанды

Астанада «Арғымақ» спорттық-сауықтыру кешенінде Астана, Жаңаөзен, Өскемен және Риддер қалаларынан келген шабандоздар арасында Астана қаласы І ашық кубогі өтті, деп хабарлайды mangystaumedia.kz Жаңаөзен қаласы әкімдігіне сілтеме беріп.

Бұл жарыс тірек-қозғалыс аппаратының зақымдануы және психикалық бұзылыстары бар адамдарды оңалту, әлеуметтік бейімдеу және әлеуметтік интеграциялау мақсатында Қазақстанның Олимпиада ойындарының арнайы бағдарламасына жолдама беру үшін ұйымдастырылған. Арнайы Олимпиада бағдарламасы бойынша спортшылар арасында Жаңаөзеннен аттанған Нұрғалиев Ақылбек ІІ орын, Толыбай Нұр ІІІ орын және Бисенбаев Берекет ІІІ орын иеленді. Олар атты ерттеп, шауып, өз дағдыларын көрсетті.

Турнир ұйымдастырушылары бұл бағдарламаны елімізде танымал ету ерекше қажеттіліктері бар қазақстандық шабандоздарға Олимпиада ойындарына қатысуға мүмкіндік беретініне сенімді. Жарыс аяқталғаннан кейін спортшылар естелік сыйлықтар мен сертификаттар алды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.