Қос Бауыржан Ел чемпионатында топ жарды

     Орал қаласында жастар арасында самбодан Ел біріншілігі мәресіне жетті. Ел тәуелсіздігінің 25 жылдығына орай өткізілген жарыстан маңғыстаулық қос балуан Бауыржан Сағынғалиұлы мен Бауыржан Нарбаев топ жарып, ағымдағы жылы өтетін Азия және Әлем чемпионаттарына жолдама алды. Аталған біріншілікке Астана мен Алматы қалаларынан, еліміздің 14 облысынан 9 салмақ дәрежесінде 300-ден астам жігіттер мен қыздар қатысып, бақ сынаған. Боз кілем үстінде болған белдесуде жерлесіміз 62 келі салмақта Бауыржан Сағынғалиұлы алтыннан алқа тағып, ҚР чемпионы атанды. Бауыржан бұған дейін жастар арасында самбодан екі дүркін Азия чемпионы және әлем чемпионатының қола жүлдегері атанған. Сондай-ақ, аталмыш жарыста 57 келі салмақта Бауыржан Нарбаев қоланы қанағат тұтты. Жарысқа балуандарды белгілі бапкерлер Манарбек Бисекенов, Сергей Волобуев және Берік Жұмағалиев дайындаған. -Сәуір айының 7 мен 10 аралығында Орал қаласында 1996-1998 жылы туған жастар арасында самбо күресінен Қазақстан Республикасының чемпионаты өтті. Жарысқа облыстың намысын қорғауға 12 ұл мен 6 қызды апардық. Өкінішке орай, қыздарымыз жақсы нәтиже көрсете алған жоқ. Ұлдар арасында 62 келі салмақта Бауыржан Сағынғалиұлы алтынды және 57 келі салмақта Бауыржан Нарбаев қоланы иеленді. Біздің биылғы қойған мақсатымыз-Әлем чемпионатына үш балуанды қатыстыру болатын. Алла сәтін салып, облыстан мамыр айында Ашхабадта өтетін Азия және қазан айында Румынияда өтетін Әлем чемпионатынаттарына бес балуанымыз жолдама алды. Олар: Айболат Мұратұлы, Сұңғат Жұбатқан, Бауыржан Сағынғалиұлы, Бауыржан Нарбаев, Нұркен Домбаев. Енді алдағы меже-Азия және Әлем чемпионаттарында қоржындарымызды жүлделі орындармен толтыру,-дейді Ақтаудағы жастар мен жасөспірімдерге арналған «Жастар» спорт мектебінің басшысы Манарбек Бисекенов.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.