Маңғыстаулық 3 спортшы джиу-джитсудан Азия чемпионы атанды

Ақтау қаласында 13-15 шілде аралығында Джиу-джитсудан Азия чемпионаты өтті. Сайыста әлемнің 20 елінен  400-ден астам спортшы сынға түсті. Таиланд, Түрікменстан, Финляндия, Корея, Йордания, Украина, Пәкістан, Тәжікстан, Индия  секілді мемлекеттердің үздік спортшылары қатысты. Чемпионаттың бірден-бір ерекшелігі - отандық джиу-джитсу тарихында тұңғыш рет ерлер мен әйелдер арасында джиу-джитсудің 4 бағыты бойынша жарыстың өтуі. Спорттық іс-шараның ұйымдастырушылары Маңғыстау облысының әкімдігі және ҚР Мәдениет және спорт министрлігі Спорт комитеті, Джиу-джитсу Азия одағы, Қазақстан Республикасының джиу-джитсу қауымдастығы. «Джиу-джитсудан Азия чемпионаты Азия елдері арасында үшінші рет өткізіліп жатыр. Жарыс екі күнге созылды. 15 шілде күні Ақтау қаласында Джиу-джитсудан Азия Қауымдастығының конгресі өтті. Бұл жиында алдағы уақытта жарыстың және қауымдастық жұмысының жоспарлары талқыланды. Қазіргі таңда қандай өзгертулер мен толықтырулар бар екені айтылды. Жарыс рейтингі жағынан жоғары болып есептеліп отыр. Бұл  - тамыз айында Индонезияның Джакарта қаласында өтетін Азия ойындарының алдындағы бірден-бір дайындық жарысы. Конгресс алдағы уақытта Ақтау қаласында жыл сайын джиу-джитсудан халықаралық  деңгейде бір жарыс өткізу мүмкіндігін қарайтынын атап өтті», - деді Маңғыстау облыстық джиу-джитсу федерациясының вице-президенті Ерғали Скендеров. Джиу-джитсу - бүгінгі таңда 100-ден астам елде дамып келе жатқан спорт түрі. Айта кетейік, бұл спорт дүниежүзілік және жазғы Азия ойындарының бағдарламасына енген. Жарыс қорытындысы бойынша Қазақстан Ұлттық құрама командасы 14 алтын, 24 күміс, 23 қола иеленіп, командалық есепте I орынға шықса, Таиланд мемлекеті II орынды иеленді, ал Түркіменстан құрамасы III орынға шықты. «Қазақстан бойынша Ұлттық құрамадан 80-дей спортшы қатысты, соның 18-і - маңғыстаулықтар. Маңғыстау облысының еншісінде 11 медаль бар. Оның 3-уі алтын, 7-уі күміс және 1-уі қола», - деді Ерғали Скендеров.

Асылзат ӨСЕРҚЫЗЫ Суреттерді Маңғыстау облыстық джиу-джитсу федерациясы ұсынды

[gallery td_select_gallery_slide="slide" ids="57943,57940,57941"]