Бейнеуде грек-рим күресінен облыстық ашық біріншілік өтті

Бейнеу ауданында алғаш рет осыдан екі жыл бұрын грек-рим күресі үйірмесі ашылды. Қазіргі таңда бұл спорт түрімен тұрақты түрде елу бала шұғылданады. Жаттықтырушысы - Ирлан Байшекенов. Аталған күрес түрінен ауданның намысын жоғары деңгейде қорғап жүрген спортшылар республикалық, облыстық жарыстардың жеңімпаздары атанған. Республикалық чемпиондар: Самат Ермеков, Парасат Демеуов, Самат Төлегенов, Жәнібек Әділханов, Шыңғыс Оррабеков сынды мықтылар.

2016-2017 жыл екі жыл қатарынан аудан құрама спортшылары чемпион атағын иеленді.

Жуырда «Болашаққа бағдар: рухани жаңғыру» бағдарламасы аясында Бейнеу аудандық балалар-жасөспірімдер спорт мектебінде Маңғыстау облысының жасөспірімдер арасындағы грек-рим күресінен облыстық ашық біріншілігі жарысы өтті. Жарыстың мақсаты - жасөспірімдерді жаппай дене шынықтыру және спортпен жүйелі түрде айналысуға тарту, спортшылар арасындағы достық қарым-қатынасты нығайту және грек-рим күресін кеңінен насихаттап, дамыту.

Грек-рим жарысына 6 команда: Ақтау, Жаңаөзен, Мұнайлы, Маңғыстау, Қызылсай, Бейнеу командаларынан 137 оқушы қатысты. Күресте әр түрлі салмақ дәрежесі бойынша спортшылар сынға түсті. 2 күнге созылған бұл додада  спортшылар өте жоғары деңгейде өз шеберліктерін көрсетіп, күресе білді. Жарыстың нәтижесі бойынша төрешілердің шешімімен І орынды Бейнеу ауданының құрамасы жеңсе, ІІ орын Жаңаөзен қаласының құрамасы мен ІІІ орынды Ақтау қаласының құрамасы иеленді. Жеңімпаздарымызға арнайы тағайындалған төсбелгілер мен кубоктар, дәрежелі дипломдар табысталып, марапатталды.

Үміт ҚАЗДАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.