«Ралли Қазақстан – 2017» алғашқы күнінде польшалық Якуб Пшигонскидің бағы жанды

©

Бұған дейін хабарлағанымыздай, кеше, 21 мамыр күні «Ралли Казақстан — 2017» алғашқы этабын өткізді. Сайыс Ақтау қаласынан Форт-Шевченко бағытындағы 35-шақырымнан бастау алған еді. Өңірді қалың тұман басуына байланысты этап белгіленген мерзімнен екі жарым сағатқа кешікті. Дегенмен жарыс күні өте сәтті өтті деуге болады. «Ралли Қазақстан-2017» баспасөз қызметінің хабарлауынша , ең бірінші жарыс күні алғашқы болып польшалық Якуб Пшигонски  (штурман бельгиялық Том Колсул) келген,  ал бесінші орында Маңғыстау өңірінің намысын қорғаған Юрий Сазонов (штурман Виталий Евтехов)  тұр.  Сонымен, 1-күні алғашқы 10-дыққа шыққан шабандоздар төмендегі кестеде:

Якуб Пшигонски (Польша)/Том Колсул (Бельгия) Mini All4 Racing              2 сағ 30 мин 56сек

Нассер Салех Аль-Аттия (Катар)/Матье Бомель (Франция) Toyota Hilux Overdrive 2сағ33мин 52сек

Арон Домзала (Польша)/Мацей Мартон (Польша) Toyota Hilux Overdrive 2сағ 35мин 42сек

Мирослав Заплетал (Чехия)/Марек Сикора (Чехия) Hummer H3 Evo VII     2сағ 36мин 48сек

Юрий Сазонов (Қазақстан)/Виталий Евтехов (Қазақстан) Hummer H3 Evo VIII 2сағ 39мин 25сек

Ерден Шагиров (Қазақстан)/Дмитрий Цыро (Украина) Toyota Hilux 2сағ 43мин 49сек

Антанас Юкневичус (Литва)/Дариус Вайчулис (Литва) Toyota Hilux 2сағ 49мин 15сек

Виктор Хорошавцев (Ресей)/Антон Николаев (Ресей) BMW X3 CC 2сағ 54мин 55сек

Язир Сейдан (Сауд Арабиясы)/Алексей Кузьмич (Ресей) Toyota Land Cruiser T2 3 сағ11мин 01сек

Адель Абдулла (Катар)/Себастьен Делоне (Франция) Nissan Patrol T2 3сағ 11мин 27сек

Өткен жылғы Әлем Чемпионатында үздік ондыққа ілінген Юрий Сазонов бастаған экипаж сайыстың алғашқы күнін сәтті аяқтады деуге толық негіз бар. Оған жерлесіміздің мына сөзі дәлел: — Старттан финишке дейінгі аралықтағы әсерді сөзбен жеткізу мүмкін емес. Жолды өте жақсы жүріп өттік. Өзге қатысушылардан да естіп жатырмын, жол өте ыңғайлы болды. Бүгінгі күн тез өтіп кетті, ертеңгі жарысты асыға күтудеміз. Ешқандай қиындық болған жоқ. Оның үстіне, алғашқы жарысым емес. Раллидің барлық V этабына да қатысу мүмкіндігіне ие болып келемін. Өз өлкемізде жүргендіктен, жарысып емес, шабыттанып, рахаттанып қайттық десе де болады. Спортшыға бұдан артық не керек? Мен өз үйімде жүрмін, сондықтан жеңгім келеді, жеңіс тұғырына табан тірегім келеді, — деп жымиды Юрий Сазонов. -Таңертең аздап ауа райы қолайсыздық тудырғаны болмаса, бүгінгі жарыс күні қызықты өтті деуге болады. Қалың тұман салдарынан тікұшақ әуеге көтеріле алмады, жарысты бастау үшін тұманның басылғанын күтуге тура келді. Спортшылардың жағдайы жақсы, бірақ жол үстінде бір-екі автомобиль бұзылды. Техникаға ештеңе істей алмаймыз ғой. Мен негізі бұл жарыстың ұйымдастырушыларының бірімін. Бірақ бұл жолы қатысушылар қатарындамын. Сол себепті жолды, бағыттарды дайындауға араласқан жоқпын. Оларды ұйымдастырушы топтағы өзге қызметкерлер дайындады, — дейді қатысушылардың бірі, ҚР Автомотоспорт Федерациясының президенті Марат Әбіқаев. Естеріңізге сала кетейік, «Ралли Казақстан — 2017» 20-26 мамыр аралығында Маңғыстау өңірінде өтеді. Сайыс алты этаптан тұрады. Оған  әлемнің 15 елінен (Казақстан, Сауд Арабиясы, БАӘ, Катар, Ресей, Украина, Польша, Литва, Германия, Чехия, Белоруссия, Нидерланды, Словения, Франция) 25 экипаж (50 спортшы) қатысып жатыр. Алда әлі 5 этап бар.

Теңге БЕКМҰРЗАЕВА