Ең жас қатысушы: "Юрий Сазоновтан озуға мүмкіндік бар!"

©

«Ралли Қазақстан-2017» байқауындағы ең жас автошабандоз Ерден ШАГИРОВ (штурманы украиналық Дмитрий Цыро) "Юрий Сазоновты озуға мүмкіндік бар", - дейді. Кеше "Кендірлі" демалыс аймағында Ралли рейд қатысушыларына арнайы киіз үй тігілген болатын. Кешкі салқында киіз үй ішінде ең жас шабандоз Ерден Шагировпен әңгіме-дүкен құрдық. Ары қарай Ерден Шагировтің өз сөзімен беруді жөн көрдік. 

Мен 18 жасымнан бері мұндай жарыстарға қатысып келемін, биыл 3-жыл. Мен Катар республикасында өткен Әлем кубогына қатыстым, сол себепті «Ралли Қазақстан-2017» жарысына дайындалуға уақытым да, мүмкіндігім де болған жоқ. Осы жылы экономика саласы бойынша оқуды бітірдім, емтиханым біте сала, осы жарысқа аттандым. Әзірге, жарысқа қатысу – мен үшін хобби, бірақ спорт саласында жеткім келетін мақсат, арман көп. 3 жыл аралығында Ралли рейд бойынша үздік 5-тікке кіргім келеді. Қазір жақсы айналым жасап жүрмін, сондықтан бұл мақсатқа жету қиын емес деп ойлаймын.

• Кеше, яғни 3-кезеңде ең көбі 170-180 км/сағ максималды жылдамдықпен жүріп отырдық. Құм, тау-таста жүрген кезде орташа жылдамдық шамамен 90-100 км/сағ. Біз басқалардан көп қалып қойдық, өйткені бензонасоста кішігірім кедергілер болды. 8-нөмірде стартты бастап, 6-болып келдік.
• Бұл спортқа мен кездейсоқ келдім. Алғаш машинаға қызық үшін отырып, жарысып көрдім. Бірнеше рет көліктер жарысына қатыса бастаған соң, жауапкершілікті, машинаны шын сезіне бастадым. Адам рөлге отырғанда машинаны сезініп, басқара білу керек.

                     

• 3 этапта да көп жануарлар кездесті. Түйе, жылқылар жол бойында қаптап жүреді. Ондай кезде жылдамдықты бәсеңдетіп, сабырлы түрде өтіп кету керек. Асығып, аптыққаннан пайда жоқ.
• Бұл жарыстағы мақсатым, үздік 5-тікке кіру. Қазір 5-болып Юрий Сазонов тұр, ұпай айырмашылығымыз алшақ емес. Әлі озып кетуге мүмкіндік бар.

Әңгімелескен Теңге БЕКМҰРЗАЕВА