Ақтауда «Сиқырлы таяқша» ІІІ республикалық дирижерлер байқауы басталды

©

Ақтауда Боздақ Рзаханов атындағы «Сиқырлы таяқша» ІІІ республикалық дирижерлер байқауы басталды. Байқау сәуірдің 23-25 күндері аралығында М.Өскінбаев атындағы Маңғыстау облыстық филармониясының А.Тарақұлы атындағы қазақ оркестрінің қатысуымен өтеді. Аталған шараға Маңғыстау, Түркістан, Атырау, Ақтөбе, Қостанай және Нұр-Сұлтан, Алматы қалаларынан келген 13 үміткер қатысып жатыр, - деп хабарлайды mangystaumedia.kz сайты. «Боздақ Рзаханов – Маңғыстау топырағынан шыққан алғашқы кәсіби дирижер және домбырашы. Оның шығармашылығын кеңінен насихаттап, кейінгі ұрпаққа жеткізу – басты мақсатымыз. Сондай-ақ байқау жас таланттарды анықтауға және олардың кәсіби шеберлігін шыңдауға мүмкіндік береді. Дарынды әрі алғыр музыка майталмандары арқылы Қазақстанның музыкалық мәдениетінің деңгейін көтереді», - дейді Маңғыстау облыстық филармониясының директоры Бекбол Базарбаев. Екі күнге жалғасатын республикалық байқауда 20-35 жас аралығындағы он үш қатысушы бақ сынауда. Олар 3 кезең бойынша 6-7 туындыны орындап, өз шеберлігін көрсетеді. Ал қатысушылардың өнеріне Қазақстанның еңбек сіңірген қайраткерлері, мәдениет саласының үздіктері әділ баға беріп, үздікті анықтайды. Атап айтқанда, Қазақстан композиторлар одағының мүшесі, Нұр-сұлтан қаласы мемлекеттік академиялық филармониясының қазақ оркестрінің көркемдік жетекшісі және бас дирижері, профессор, қазылар алқасының төрағасы Айтқали Жайымов, Н.Тілендиев атындағы мемлекеттік академиялық фольклорлы-этнографиялық «Отырар сазы» оркестрінің дирижері, профессор Жалғасбек Бегендіков, сонымен қатар Нұр-Сұлтан қаласы мемлекеттік академиялық филармониясындағы қазақ оркестрінің бас директоры және көркемдік жетекшісі Сәкен Әбдірахманов, Қазақстан композиторлар одағының мүшесі, Батыс Қазақстан облысы Ғ.Құрманғалиев атындағы филармониясының Дәулеткерей атындағы қазақ оркестрінің көркемдік жетекшісі және бас дирижері Еркін Нұрымбетов, А.Тарақұлы атындағы ұлт-аспаптар оркестрінің көркемдік жетекшісі және бас дирижері Рахат Мадреев төрелік етеді. Аталмыш байқауда гран-при алған қатысушы 1 миллион теңге ақшалай сыйлыққа ие болады. Жүлделі 1-орын алған қатысушыға 700 мың теңге, 2-орын иегеріне 500 мың теңге және 3-орын алған қатысушыға 350 мың теңге қаржылай сыйлық тағайындалған.

Жұлдызай ҚАЛИЕВА Суретті ұсынған Өңірлік коммуникациялар қызметі