Қуыршақ театры жүлдемен оралды

©

Театр – мәдениет ошағы, һәм ұйытқысы. Ел өмірінің айнасына айналған театрларымыз күннен-күнге шама-шарқынша дамып келеді. Алыс-жақын шетелге танылып, әлінше өз өнерін көрсетіп, еліміздің танылуына үлес қосып жүрген жайы бар. Сол театрлардың бірі – Маңғыстау облыстық қуыршақ театры. Аталған өнер ошағы қала тұрғындары мен қонақтарын қуантудан жалыққан емес. Репертуарларында сан түрлі спектакль бар. Театр ұжымы үнемі гастрольдік сапарлармен түрлі фестивальдерге барып қана қоймай, жүлделі орын иеленіп келеді. Бізбен жағымды жаңалықтарымен бөлісуді де ұмытпайды. Осы жолы да театрдың басшысы Фарида Атакеева өзі хабарласып, сүйінші сұраған еді.

Облыстық қуыршақ театр ұжымы Астрахань қаласында өткен Каспий жағалауы  елдерінің VI Халықаралық «Каспийский берег» қуыршақ театрлары фестиваліне қатысып, жеңіспен оралды.

Ауқымды жиынға қатысқан әрбір театр керемет көрініс қойып, көрермендерді қуантты. Маңғыстаулық өнер ұжымы аталған фестиваль сахнасында Н.Насырованың «Айжан әжейдің ертегісі» спектаклін көрсетті. Көрермен лық толған залда қойылым зор ықыласқа бөленді. Көпшілік тапжылмай тамашалап, өз бағасын берді. Театрдың актрисасы Бану Түстікбековаға «Үздік актерлік жұмыс» және қоюшы-суретші М.Маденовке «Үздік сценографиясы үшін» номинациялары табысталды.

Мұндай фестивальдер бізге шабыт беріп, тәжірибе алмасуымызға зор мүмкіндіктер тудырады. Бірнеше елден жиналған театр майталмандарының қойылымдары мен шеберліктерін көріп, өзіміздің олардан еш қалыс емес екенімізді байқадық, – дейді өз сөзінде театр басшысы.

Зухра ӘБДІЛ-САТТАР

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.