Наурыз – көктем батасы
[ 2018 ] 26 наурыз, 06:39 | Мәдениет
Уа, құдыреті күшті Құдайым,
Ойға алған талабымызды оңдағай,
Әулие-әмбиелер де қолдағай,
Мединада – Мұхаммед,
Түркістанда – Қожа Ахмет,
Маңғыстауда – Пір Бекет!
Тілегімізді қабыл еткей,
Мақсат-мұратымызды мақұл еткей.
Қабырғалы еліміз, ұлан-байтақ жеріміз:
көлденең көк аттының кеселінен,
көре алмаған көрсоқырдың өсегінен аман болғай,
Ұлан-ұрпағымыз ата аманатына адал болғай.
Басымыз аман, бауырымыз бүтін,
«Мен – Қазақтың!» түзу ұшқай түтіні!
Алладан шапағат дарып,
Құт-береке, бақ қонып,
Көгімізден алтын нұр,
Жүрегімізден ар-иман
ақ жауындай жауа бергей,
Бір-бірімізге деген ниетіміз ізгі,
пейіліміз кіршіксіз болып,
періштелер «әумин!» десіп,
жанымызға дауа бергей!
Ләйім жас өскіндерімізді тіл-көзден,
бәле-жаладан Тәңір сақтасын,
Елі-жұрты, ағайын-тума, халқының,
Ата-ананың сенімі мен үмітін ақтасын,
Ләйім алдарынан ақ күн туып,
базарлы, баянды болғай,
бір-біріне аяулы болғай,
жапырақтары жайылсын,
жан-жақтары толып, рухани байысын.
Көгершін-көңіл
қуаныш пен көктем-тілектен босай берсін,
бабалар дәстүрі мәңгі жасай берсін!
Сұғынған сұқ көздерді дарытпалық,
Ұлы Өмір – өзен - айдында атымызды арытпалық.
Жортқанда жолымыз,
Қыдыр ата жолдасымыз болып,
еш шаршап-шалдықпалық.
О, ұлы Жаратқан,
Ұлы Қазақ,
Баршаның жүзін-
жарқын да жалынды еткейсің,
Тонның ішкі бауындай
ынтымағы бір қауым еткейсің.
Наурыз құтты, ақ мол, көңіл көл,
көже дәмді болсын,
Ортамыз толып, өміріміз сәнді болсын.
Рухымыз өсіп, салтанатымыз аса бергей,
Аруақты ата-бабалар дем беріп,
Мерейіміз таса бергей!
Ғалым ӘРІП,
ҚР Мәдениет қайраткері
ТАҒЫ ОҚЫҢЫЗ: Жаңа зауыт — өмір талабы
1141
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
