Ақтауда Түпқараған ауданының мәдени күндері басталды

Бүгін Абай атындағы мәдени-демалыс кешенінде Қазақстан Республикасы Тәуелсіздігінің 30 жылдығына орай Түпқараған ауданы мәдени күндерінің ашылу салтанаты өтті, - деп хабарлайды mangystaumedia.kz.

Салтанатты шараға Маңғыстау облысы әкімінің орынбасары Бекбол Орынбасаров, Ақтау қаласының әкімі Нұрдәулет Қилыбай, Түпқараған ауданының әкімі Айбек Қосуақұлы, ауданға қарасты ауыл әкімдері мен украин диаспорасының өкілдері, еңбек және ауған соғысы ардагерлері және жастар, өнер ұжымдары қатысты.

Жиынға қатысушылар ел Тәуелсіздігінің 30 жылдығы мен Форт-Шевченко қаласының 175 жылдығына орай ұйымдастырылған сурет және ұлттық өнер көрмесін тамашалады. Мәдени күндер аясында аудан басшысы бастаған делегация мүшелері «Мәңгілік алауға» гүл шоқтарын қойып, Жалау Мыңбаев, Тарас Шевченко ескерткіштеріне тағзым етті.

«Ұлы Отан соғысында жанқиярлықпен ерлік көрсеткен бабаларымызды және есімдері Түпқараған тарихымен тікелей байланысты Жалау Мыңбаев, Тарас Шевченко секілді тұлғаларды өскелең ұрпақ ешуақытта ұмытпауға тиіс», - дейді аудан әкімі Айбек Қосуақұлы.

Сонымен қатар түпқарағандық делегация облыстық балалар үйіне тәтті дәм себет сыйлықтары мен теледидар тарту етті.

(Мақаланың толық нұсқасын «Маңғыстау» газетінің таяудағы сандарынан оқи аласыздар).

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.