Кеше Достық үйінде аймақ басшысы Нұрлан Ноғаевтың төрағалығымен денсаулық сақтау басқармасының кеңейтілген алқа отырысы өтті. Жиынға жұмыс сапарымен келген ҚР Денсаулық сақтау министрі Ақмарал Әлназарова да қатысты, - деп хабарлайды mangystaumedia.kz сайты Маңғыстау облысы әкімдігінің баспасөз қызметіне сілтеме жасап.
2023 жылдың 12 айында Маңғыстауда ана өлімінің көрсеткіші 31%, нәресте өлімі 11%, туберкулезден болатын өлім 47% төмендеген. Бұл туралы облыстық Денсаулық сақтау басқармасының басшысы Бекболат Ізбасаров айтты.
"Денсаулық сақтау саласының маңызды көрсеткіші – ана мен бала өлімі. Облыста 2023 жылы ана өлімінің екі жағдайы тіркелді, 100 мың тірі туғандарға шаққандағы көрсеткіш 9,6% болды. 1 жасқа дейінгі нәресте өлімінің деңгейі 13,7% төмендеді. Жалпы өлім деңгейі 1000 тұрғынға шаққанда 4,07%. Жүрек-қан тамырлары ауруларынан болатын өлім-жітім 31,5%, қатерлі ісіктен болатын өлім-жітім 12,1% өсті, сонымен бірге туберкулезден болатын өлім-жітім 46,7% азайды. 2022-2023 жылдары респираторлық аурулардан болатын өлім-жітім бір деңгейде қалып, 100 мың тұрғынға шаққанда 26,7 құрады", - деді Денсаулық сақтау басқармасының басшысы Бекболат Ізбасаров.
Денсаулық сақтау саласындағы басты проблеманың бірі – кадр тапшылығы. Қазір облысқа 206 маман жетпейді.
Нұрлан Ноғаевтың айтуынша, мамандар тапшылығы мәселесін шешу үшін 2022 жылы облыс әкімінің 157 гранты бөлінген. Ал 2023 жылы грант саны 198-ге дейін ұлғаяды (бакалавриат – 165, интернатура-33).
"Дипломмен ауылға" бағдарламасы ауылдық жерден жұмыс таңдаған мамандарға маңызды қолдау көрсетеді. 116 миллион теңге көлемінде біржолғы көтерме жәрдемақы алу үшін 335 маман жүгінді. Сондай-ақ 157 маманға жеңілдетілген несие бойынша тұрғын үй сатып алуға немесе салуға 811 миллион теңге бөлінді. Мемлекеттік қолдау шараларын күшейтіп, мамандарды ауылда жұмыс істеуге ынталандыру арқылы осы бағыттағы жұмысты жалғастыра береміз", - деді Нұрлан Ноғаев.
Тегін амбулаториялық дәрілік заттармен қамтамасыз етуге бөлінген қаражат көлемі 1,5 есеге ұлғайып, 2024 жылы 8,8 миллиард теңгеге жетті. Өйткені, ең алдымен, қымбат емдеу препараттарын қоса алғанда, тегін дәрі-дәрмектер тізімі кеңейді.
Сонымен қатар кездесу барысында медициналық қызмет көрсететін кәсіпкерлер міндетті медициналық сақтандыру қорының Маңғыстау филиалының жұмысына қатысты сын айтты.
Бұған жауап берген денсаулық сақтау министрі Ақмарал Әлназарова әлеуметтік медициналық сақтандыру қоры Маңғыстау филиалының жұмысына байланысты шағымдардың мән-жайын зерттеу үшін өңірге комиссия жіберу туралы тапсырма берді.
Өз кезегінде Маңғыстау облысының әкімі Нұрлан Ноғаев ресурстарды тиімсіз пайдалану медицина саласын қаржылық жүктемеге әкеп соқтыратынын атап өтті.
"Астанада өткен Үкіметтің кеңейтілген отырысында Мемлекет басшысы Қасым-Жомарт Тоқаев атап өткендей, әлеуметтік бағдарланған мемлекеттің басты міндеті – азаматтар үшін тең мүмкіндіктер жасау, шынында да көмекке мұқтаж адамдарды қолдау. Біздің ортақ мақсатымыз - әрбір адамға жоғары деңгейде медициналық қызметтің барлық түрін ұсыну. Әр адам ай сайынғы жарналарды не үшін төлейтінін түсінуі үшін бізге ашықтық қажет. Медицина - жұмысымыздағы басым бағыттардың бірі, сондықтан біз жастарға осы салада тегін білім алуға грант бөліп отырмыз. Сапалы білім алған олар халыққа көмектесу үшін аймаққа келіп жұмыс істейді", - деді Нұрлан Ноғаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
