Маңғыстауда 100-ге жуық науқас созылмалы вирусты С гепатитімен тіркелген

Маңғыстауда 2024 жылдың бірінші тоқсанында созылмалы вирусты С гепатиті бар 100-ге жуық науқас тіркелді. Бұл туралы Маңғыстау облыстық көпбейінді ауруханасы гепатология орталығының гепатологы Роза Аташева айтты, - деп хабарлайды mangystaumedia.kz сайты облыстық баспасөз қызметіне сілтеме жасап.

Маңғыстау облыстық көпбейінді ауруханасында гепатологиялық орталық жұмыс істейді. Мұнда мамандар созылмалы вирусты гепатитті анықтап, емдейді.

- Созылмалы вирусты гепатит бауырдың жұқпалы-қабыну ауруы, олардың қатарына В, С, D вирусты гепатиттер жатады. Вирус қан және жыныстық қатынас арқылы беріледі. Қазіргі уақытта В гепатитіне қарсы екпе жүргізіліп жатыр. Осы орайда пациенттерді екпе алуға шақырамын. Вакциналау тұрғындардың тұрғылықты мекенжайы бойынша емханада жасалады. Созылмалы вирусты С гепатитіне қарсы вакцина жоқ, бірақ С гепатиті жылдар бойы емделуге болатын ауру. Егер талдау нәтижелері бойынша сізге В немесе С вирустық гепатиті диагнозы қойылса, бұл жағдайда гепатологпен немесе жұқпалы аурулар жөніндегі маманмен байланысуды ұсынамыз. Денсаулығын ойлайтындардың барлығына жыл сайын В және С гепатитіне скринингтен өтуге кеңес беремін, - дейді МОКА гепатология орталығының гепатологы Роза Аташева.

Дәрігердің айтуынша, қазіргі таңда В гепатитіне қарсы қауіпсіз вакциналар мен тиімді емдеу әдістері, сондай-ақ С гепатитін толық емдейтін дәрілер бар.

Жалпы 2023 жылы гепатология орталығына созылмалы вирусты гепатитпен 400 адам тіркелген, оның ішінде: созылмалы вирусты гепатит С – 260 науқас, созылмалы вирусты гепатит В – 100-ден астам науқас.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.