Маңғыстау облыстық ауруханасында босанған әйелге жедел операция жасалды. Дәрігерлер науқастың төменгі қуыс венасына кава фильтр орнатты, - деп хабарлайды mangystaumedia.kz облыстық аурухананың баспасөз қызметіне сілтеме жасап.
Маңғыстау облыстық ауруханасының кардиохирург-дәрігері Ернұр Ордабаевтың айтуынша, науқас - 32 жаста, шамамен 28-29 күн бұрын босанған. Отаға дейінгі жағдайы қиын болды. Оған флотация белгілері бар сол жақ төменгі аяқтың жедел терең тамыр тромбозы диагнозы қойылды.
"Егер науқас дәрігерлерге жедел қаралмаған жағдайда ауру асқынып, тромбоэмболия болуы мүмкін еді. Бірақ дер кезінде аурудың алдын алып, төменгі қуыс венаға кава фильтр орнаттық. Операция сәтті өтті", - деді Маңғыстау облыстық ауруханасының кардиохирург-дәрігер Ернұр Ордабаев.
Терең тамыр тромбозы - өмірге қауіпті.
"Ұйып қалған қанның бір бөлігі үзілсе, онда бірден жүрекке ұшады. Одан әрі қарай өкпе тамырына кетеді. Ал өкпе тамыры қолқа тамырының өлшемімен бірдей. Мұндай жағдайда адам қайтыс болады. Сондықтан кава фильтр орнатып, тромбоэмболияға шалдығу деңгейін төмендеттік", - деді Маңғыстау облыстық ауруханасының кардиохирург-дәрігері Ернұр Аханұлы.
Ота шамамен 10-15 минутқа созылды. Операцияны Маңғыстау облыстық ауруханасының кардиохирург-дәрігері Ернұр Ордабаев пен интервенциялық кардиолог, аритмолог Құрбанәлі Сабдинов жасады. Қазір науқас жансақтау бөлімінен жалпы палатаға ауыстырылды.
Айта кетейік, мұндай операциялар облыстық аурухана қабырғасында арнайы Нұр-Сұлтаннан дәрігерлерді шақыртумен жасалатын. Ал 10 жылдан бері аталған операцияны жергілікті білікті дәрігерлер сәтті жасап жүр.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
