Тіл тағдыры – ұлттық идеология өзегі

Кеше «Nur Otan» партиясы жанындағы «Мирас» республикалық қоғамдық кеңесінің аймақтармен бейне-байланыс режіміндегі отырысы өтті. Келелі кеңеске партияның Маңғыстау облыстық филиалы төрағасының бірінші орынбасары Елубай Әбілов,  Маңғыстау облысы әкімінің орынбасары Қаныбек Жұмашев пен «Мирас» республикалық қоғамдық кеңесінің облыстық деңгейдегі өкілдері қатысты. Отырыс барысында ҚР Президенті Қ.Тоқаевтың «Сындарлы қоғамдық диалог- Қазақстанның тұрақтылығы мен өркендеуінің негізі» атты халыққа Жолдауындағы мемлекеттік тіл мәртебесі, ҚР тілдерді дамыту мен қолданудың 2011-2019 жылдарға арналған мемлекеттік бағдарламасының орындалысы талқыланды. Алдымен «Nur Otan»  партиясы Төрағасының бірінші орынбасары Бауыржан Бәйбек қазақ тілінің қолданыс аясын кеңейту, мемлекет қамқорлығына алу, ұлт ұйытқысына айналдыру,  тіл туралы мемлекеттік бағдарламаның орындалу сапасын арттыру турасында мазмұнды әңгіме өрбітті. «Мирас» республикалық-қоғамдық  кеңесі құрамы бірқатар зиялы қауым өкілдері,  ұлт жанашырларымен толықты. Кеңес қызметіне соны серпін берер жаңа лек құрамында айтыскер ақын Жандарбек Бұлғақов, жазушы Ұлықбек Есдәулет, сатирик-жазушы Көпен Әмірбек, тәжірибелі журналист Нұртөре  Жүсіп сынды ұлт руханиятының өркендеуіне сүбелі үлес қосып жүрген азаматтар бар. Бұл жолғы басқосу мазмұны бұрынғы кездесулерден тым бөлек. Себебі тәуелсіздік алғаннан кейінгі жылдары елдік деңгейде ең жиі талқыға түскен,  әйткенмен осы күнге дейін бір ізге түсіп, белгілі бір жүйеге ыңғайланбанған, нақты  кесімі  жоқ тіл тағдыры өзге қырынан бой көрсетіп,  өзекті пікірлер бүкпесіз айтылды. Қоғам қайраткері Оразгүл Асанғазы  «Мемлекеттік тіл туралы» заңнама мазмұнын байыппен саралау, толықтырулар мен түзетулер енгізу, мүмкін болса мүлдем жаңа заң жобасын мақұлдау қажеттігін баян етті. Елді билеу тізгінін тіл тағдыры секілді ұлт руханияты төңірегіндегі түйіткілі тым көп дүниелердің иісі мұрнына бармайтындар емес іске құлықты, ұлтқа жанашыр азаматтар ұстаса ғана ұлттық идеологияны насихаттау біртіндеп жүзеге асарына сенім білдірді.  Оразгүл Асанғазы қоғамда бұндай кереғар көзқарастың қалыптасуына  мемлекеттік іс-қағаздардың әлі күнге дейін орыс тілінде жүргізілуі, қаржы, экономика, өндіріс салаларындағы ақпарат айналымының басым үлесі орыс тілінде болуы, бұқаралық ақпарат құралдары мен ғаламтор кеңістігіндегі қазақ тілді контенттің тым аздығы, жалпы жас буын өкілдері арасында қазақ тіліне деген құрмет пен өзге ұлт өкілдерінің тіл үйренуге деген құлшынысының аз-кемдігі түрткі болғандығын да бүкпесіз баяндады. Шынтуайтында, кәрі құрлық елдерінің саяси-қоғамдық жүйесіне зер салсақ, басым бөлігі Қазақстан секілді көптеген ұлт пен этностардың басын біріктіріп отыр. Әйтседе, қай саласында болмасын мемлекеттік тілге деген азаматтардың құрметі айрықша, талап ету жағынан да қатал. Осындай  тәжірибелерге жүгіне отырып, еліміздегі тіл саясатының орындалу сапасы мен тиімділігін арттырудың жаңа тетіктерін қосуға бет бұруымыз өте қажет. Жалпы аталған кеңес отырысының тобықтай түйіні тіл тағдырына қатысты айтылған барлық  ұсыныс-пікірлердің бірін де елеусіз қалдырмай, егжей-тегжейлі ой елегінен өткізу, алда сан қайтара пікірталқыға түсіру туралы кесімді келісім болды. Өз кезегінде партия Төрағасының бірінші орынбасары Бауыржан Бәйбек мемлекеттік тілдің мәртебесін көтеріп, ұлттық сана серпілісіне қозғау салар игі істерді жұмыла атқаруда ауызбірлік пен ұстамдылық танытып, асығып-аптықпай, ілкі толқын тәжірибесі мен жас буын тәлімін заман талабына сай  ұштастыра білудің маңызына аса мән берді. «Nur Otan» партиясы Маңғыстау облыстық филиалы жанынан құрылған облыстық кеңес өкілдері де мемлекеттік тілдің қолданыс аясын кеңейтуді насихаттау турасында өз ойларын ортаға салды.

Голрох ЖЕМЕНЕЙ