Абызға арналған әдеби-сазды кеш

Киелі Маңғыстауда жарық дүние есігін ашып, тума талантымен әлемге танылып, жүрегі елім-жұртым деп соққан қазақтың кемеңгер ұлы Әбіш аға Кекілбаев биыл 80 жасқа толады. Ұлы даланың ұлықталған марқас­қасына арналып жер­жерде ел сүйсінетін әдеби-­сазды кештер, іс­-шаралар легі бірінен соң бірі оң жалғасын тауып келеді. Әр өткізілген жанға жағымды жұмыстар маңыздылығымен, мәнділігімен айшықталуда. Мұның өзі кемеңгер рухына деген жүрекжарды мың тағзымын көрсетсе керек. Жуырда Маңғыстау ауылының орталық мәдениет үйінде абыз ағаға арналып, «Замананың заңғары» атты әдеби­-сазды кеші өтті. Оған жастарымызбен қоса ел сыйлаған ата-­әжелеріміз қатысты. Сахна төрі ұлы дала перзентіне арналып, тама­ша көрініспен безендірілген. Ең алды­мен өнерлі жастарымыз, атап айтсақ, №5 орта мектептің мұғалімі Қандыбай Қайрат абыздың «Таңғы кәлима» өлеңін оқыса, №13 орта мектептің мұғалімі Абдығалі Қуаныш Әбіш ағаның шығармасынан үзін­діні нақышына келтіре орындады. Ал №3 орта мектеп мұғалімі Түзелбай Абай «Жаңа дәптер» кітабынан, №9 орта мектептің мұ­ғалімі Абылай Максутов пен Әділ Аяпбер­генов «Көне дәптер» кітабынан үзінділер оқыды. Сахналық көріністе Қандыбай Қайрат «Түнгі кәлима» өлеңін оқып, жұрт­шылықты Әбіш әлемінің тұңғиығына сүң­гіткендей әсерге бөледі. Әдеби­сазды ке­ште Қазақстанның халық жазушысы, мем­лекет және қоғам қайраткері Әбіш ағаның өмірбаяны аудио-­визуалды бейнеде баян­далды. Кеште Мұнайлы ауданының әкімі Рахат Елтизаров сөзге шығып, кемеңгер жазушы туралы толғана әңгімеледі. Ол «Әбіш аға Кекілбаев кемеңгер жазушы болумен қатар Тәуелсіз еліміздің іргетасын қаласқан қоғам қайраткері әрі көрнекті саясаткер. Талай­талай тарихи оқиғалардың басы-­қасын­да жүріп, еліміздің гүлденуіне атсалысқан білікті азамат. Оның еңбегі ұшан-­теңіз», дей келе, «Әбіш әлеміне әлі де тереңдей үңіліп, зерттей түсу – кейінгі ұрпақ еншісінде», де­генді баса айтты. Аудан басшысының мерейтойлық лебізінен соң сахна төріне кештің қонағы, Ш.Есенов атындағы Каспий мемлекет­тік технологиялар және инжиниринг уни­верситетінің қазақ тілі мен әдебиеті ка­федрасының меңгерушісі Ақмарал Отар­баева шақырылды. Кеш қонағы сөз шебері, классик жазушы, көрнекті мемлекет және қоғам қайраткері, Қазақстанның Еңбек Ері Әбіш аға жайында кеңінен толғап, өз баян­дамасын жасады. Ал кештің келесі қона­ғы, өлкемізге белгілі қадірменді ел ағасы, өлкетанушы Отыншы аға Көшбайұлы да сөзге шығып, Әбіш ағаның біз білмейтін беймәлім қырына тереңдей үңілді. Қызық­ты деректер жайында сөз етіп, залдағы көрермендерді тәнті етті. Барша жұрт ұйып тыңдаған тың деректер жүректен жү­ректерге жетіп жатты. Аудандық мәдениет, дене шынық­тыру және спорт бөлімінің басшы­сы Есенбай Құли жүргізген кеште Әбіш ағаның «Шыңырау» пьесасының же­лісінде театрландырылған шығарма қо­йылды. Қырық минутқа созылған сахналық қойылымды абыз ағаның 80 жылдығына орай «Алтын шуақ» облыстық драма ұжым­дары арасындағы байқауда ауданымыздың намысын қорғап, жүлделі 3-­ші орынға ие болған Қызылтөбе ауылдық мәдениет үйінің халықтық драма ұжымы орындады. Шығармадағы Еңсеп рөлін Қосай Елбе­теров, автор – Әбіш Кекілбаевты Наурыз Орынбай, әкесі Құлжанды Серік Ораз­баев, Анасының рөлін Сәнім Құлбаева, құдықшылар рөлін Ислам Темірбек, Жан­дос Мурадов, Данияр Ишберген, Асқар Кузембаев сомдаса, ағасы Дәржанды Сағынғали Жаңабергенов, жеңгесі Ханым­ды Тыныштық Қармысова, інісі Теңселді Мирас Аязбай, Шал­-Төкен байды Бөкен байды Саламат Бүркітов, Төкен байдың нөкерін Туркменбай Бекболат, Байсал бай­ды Бекболат Ыбраев және Қыз, Еңсептің келіншегі рөлін Мөлдір Қызыл шеберлікпен орындай білді. Сахна төрінде керемет қойылған драмалық шығарма көрермен­ді ризашылыққа бөледі. Жиі­-жиі қол соғып, алғыстар айтылды. Мұның өзі тартымды туындының кереметтілігін ай­қындаса керек. Мәңгі өлмейтін шығарма­лар ел жадында осылай жаңғырып жата­ды. Әбіш аға әлемі әлі де өрісі кеңейіп, өз халқына қызметін жасай беретіні ақиқат. Сахналық шығармадан соң Әбіш аға­ның сөзіне жазылған Есенбай Құлидың «Дәуренім менің» әнін ән авторы орында­ды.

Д.ХАНСҰЛТАНҰЛЫ