Жаңа үй – жайлы мекен

Арайлы Ақтау қаласының 55 жылдық мерейтойы қарсаңында жаңа тұрғын үй кешені ел игілігіне берілді. 32А шағынауданында бой көтерген көп қабатты үйдің салтанатты ашылу рәсіміне Маңғыстау облысының әкімі Ералы Тоғжанов, облыстық мәслихат депутаттары, қоғамдық ұйым мүшелері мен тұрғындар қатысты.

Мемлекет басшысы Нұр­сұлтан Назарбаевтың бастамасымен жүзеге асқан «Нұрлы жер» бағдарламасы аясында облыс орталығында көп қабатты тұрғын үй бой көтеріп, көпшіліктің көптен күткен арманы орындалды. Облыс әкімі Ералы Тоғжанов жұртшылықты қоныс тойларымен құттықтады.

«Қайырлы күн, құрметті ағайын! Ақтау қаласының 55 жылдық тойы қуанышты жаңалықтармен бастал­ды. Әсем шаһардың құрылғанына жарты ғасырдан сәл асқанымен, қасиетті Маңғыстау түбегін ата-­бабаларымыз ежелден мекен еткен. Жуырда ғана Елбасы Нұрсұлтан Назарбаевтың төрағалығымен Кас­пий теңізінің тағдыры шешілген жиын өтті. Қазақ даласының, ел шекарасының нүктесі Ақтау қала­сында қойылды. Ақтау төрінде мем­лекет басшылары Каспий теңізі­нің құқықтық мәртебесін айқын­дап, ортақ ұйғарым шығарды. Бұл Ақтау саммиті деген атаумен бүкіл дүниежүзіне тарады. Осындай абырой-­беделге Елбасымыздың салиқалы саясатымен, халықтың қолдауымен, ауызбіршілігімен жет­тік»,– деп облыс басшысы бүгінгі шараның да мемлекеттік маңызы бар әлеуметтік жоба екенін еске салды.

«Халыққа берілгелі отырған тұрғын үй кешені де Елбасымыз­дың «Нұрлы жер» деп аталатын бағдарламасы негізінде салынып отыр. Бұл жобаның мақсаты – тұр­ғындарды қолжетімді баспанамен қамтамасыз ету. Бір Ақтау қала­сының өзінде бүгінге дейін 9 мың­нан аса азамат үй кезегінде тұрған болса, бұл көрсеткіш жыл сайын 700-­дей адамға көбейіп келеді. Бүгін, міне, бір ғана тұрғын үй кешенінде 478 отбасы пәтер  кіл­тін алып, баспаналы болғалы тұр. Қуаныштарыңыз ұзағынан болсын, тойларыңыз тарқамасын», – деген облыс басшысы Ералы Лұқпанұлы жобаны жүзеге асыруға атсалысқан «Қазақстан ипотекалық компания­сы» мен «Оңдасын-­Строй» құрылыс компаниясына алғыс білдірді.

Салтанатты шарада тұрғын үй пәтерлерін халыққа жеңілдікпен ұсынған «Қазақстан ипотекалық компаниясы» АҚ басқарма төраға­сының орынбасары Руслан Кәкім тұрғындарға жоба туралы баяндап, өз сөзін «Қала күнімен қатар келген қоныс тойларыңыз құтты болсын» деп аяқтады.

Бұл күні баспаналы болған тұр­ғындардың қуанышында шек болған жоқ. Облыс әкімі Ералы Тоғжанов пен «Қазақстан ипотекалық компа­ниясы» АҚ басқарма төрағасының орынбасары Руслан Кәкім сахна төрінде тұрғындарға пәтер кілтте­рін табыстады. Мемлекеттік қыз­мет саласында еңбек етіп келе жат­қан Айгүл Алмамедова тұрғындар атынан риясыз алғысын арнады. Екі бөлмелі пәтерге қол жеткізген қызының қуанышына асыға жет­кен зейнеткер Айша Әбдімәлікова «Нұрлы жер» бағдарламасымен елге жасалып жатқан жағдайларға ризалық танытып, тілегін айтты. Ал мемлекеттік балабақшада қызмет етіп келе жатқан Шырын Ержа­нова осы күнді үш жыл күткен екен. «Алғаш бағдарлама туралы естігенде дереу құжаттарымды жи­нап, біріншілердің қатарында өті­нім тапсырған едім. Бұған дейін пә­тер жалдап келдік. Енді өзіміздің баспанамыз бар. Өте қуаныштымыз. Бәріне рақмет айтамын», – дейді ол.

Жаңа үйдің лентасын салтанат­ты түрде Маңғыстау облысының әкімі Ералы Тоғжанов пен құры­лыс саласының еңбек ардагері Жақсығали Жакиев ақсақал қиды. Облыс басшысы бастаған қонақтар пәтерлерді аралап, қоныстарына ақ тілек, ізгі лебіздерін білдірді.

«Оңдасын­-Строй» құрылыс ком­паниясы салған жаңа үй негізінен жылу сақтауға арналған газаблок материалынан және монолитті бе­тоннан тұрғызылған. Әр пәтерде бөлмеаралық есіктер, жуынатын бөлме жабдықтары, сондай-­ақ ас бөлмеде газ плитасы, коммуналдық есептеуіш аппараттары орнатылған. Мұндағы бір бөлмелі пәтерлердің көлемі – 43-45, екі бөлмелісі – 52-­67, үш бөлмелілер – 78-­89 шаршы метр. Әлеуметтік бағдарлама арқылы тұр­ғындарға берілетін жеңілдіктері де көңіл қуантарлықтай. 20 жылға на­рықтағы бағадан төмен арендалық төлем жасап, мерзімі аяқталғаннан кейін пәтерді өз атына аудара алады.

Жайық НАҒЫМАШ, Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.