Көгілдір отын қымбаттауы мүмкін

©

Маңғыстау облысында көгілдір отын құны тағы да қымбаттауы мүмкін. Бұл жөнінде «Қазтрансгазаймақ» компаниясының өкілдері мәлім етті.

Айта кетсек, мамыр айында Энерге­тика министрлігі газдың көтерме бағасын 15%­-ға өсіру туралы бұй­рықты қабылдаған. Ал республикаға көгілдір отын таратушы «Қазтрансгазаймақ» компания­сы тарифті 9%-­ға өсіруді сұрап отыр. Бұған тұтынушылардың көбеюі себеп болып отыр.

«Жаңа аудандар пайда болды, сәйкесінше газды тұтынушылар да көбейді. Сонымен қатар мамандар тарту қажеттілігі туында­ды. Материалдық шығындар көбейді. Кейбір тауарлардың бағасы қымбаттады. Сондай-­ақ құрал-­жабдықтарды жаңарту қажеттілігі бар», – дейді «Қазтрансгазаймақ» МОФ директоры Алпамыс Қисметов.

Газ нарығында негізгі үлесті алып отырған компанияның бүгінде 1,7 млн. абоненті бар. Оның 150 мыңы – Маңғыстауда. Қазіргі таң­да өңірде 3 875 шақырымдық газ желісі жүр­гізілсе, биыл тағы 100 шақырым тартылады. «Қазтрансгазаймақтың» ең ірі тұтынушысы «МАЭК­-Қазатомөнеркәсіп» серіктестігі бұл ұсынысқа келіспеушілік білдірді. «Онсыз да газдың борышы 3 млрд. теңгеден асады. Бұл шешім коммуналдық қызмет құнының көте­рілуіне алып келеді», – дейді компания өкілдері.

Еске салсақ, коммуналдық қызмет құны өткен жылдан бері 7%-­ға өскен. Ал қала тұрғындары бағаны көтеру негізсіз екенін алға тартады. Себебі газ қымбаттаса, коммуналдық қызмет құны да шарықтап кетеді.

«Қоғамдық талқылау заңдылықтары бұзылды. Мен эконо­мист ретінде айтарым, компанияның тарифті өсіруіне негіз жоқ. Қарыздарды өндіріп алса, тарифті өсірмей-­ақ құбырларды кеңейтуіне болады. Ал тұтынушылар көбейді деген се­бепті түсінбедім. Нарық заманында компания­лар тұтынушыға таласу керек емес пе?» - дейді Ақтау қаласының тұрғыны Никар Рафикова.

Енді соңғы шешімді Табиғи монополияларды реттеу комитеті қабылдауы керек.

Ноян ЖОЯМЕРГЕН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.