Маңғыстау ауданында 161 мыңнан астам ағаш отырғызылды

©

Маңғыстау ауданындағы кезекті сенбілік 21 сәуір күні Бүкілқазақстандық ағаш отырғызу күніне орай ұйымдастырылды.

Шетпе бойынша акцияға 330 адам қатысты. Орталық саябаққа 100, Шетпе-1 шағынауданындағы саябаққа 30, Жаңа Орпа шағынауданындағы саябаққа 100 түп қара ағаш, аудан әкімдігі ғимаратының алдына 50 түп раушан гүлі, Шетпе гимназиясының шарбағына 40 шаршы метр жерге гүл отырғызылды.

Ақшымырау ауылынан сенбілікке жұмылған 136 адам жағдайы төмен 10 отбасыға қол көмектерін берді, ауыл көшелерін тазартып, Тобықтыдағы Бекет ата жерасты мешітінің айналасына тазалық жұмыстарын жүргізді. Акция аясында ауылға 40 түп шыбық отырғызылды.

Қызан ауылында арнайы техника көмегімен орталық көшелерге топырақ төселді. «Қаламқас» өндірістік мекемесінің жұмысшылары және ауыл жастары бірлесіп, орталыққа сахна тұрғызды. Қоқыстан тазарған ауыл көркі ажарлана түсіп, егілген 40 шырша тұрғындардың еңбегін еселей түсті.

Ауылдың іші-сыртын қоқыстан тазартуға атсалысқан шайырлықтар 20 шырша екті.

Тұщықұдық ауылы бойынша Бүкілқазақстандық ағаш отырғызу күні акциясына 102 адам қатысты. Жұмыла жасаған жұмыстың нәтижесінде С.Жаңғабылов атындағы орта мектеп шарбағына 35 түп терек, «Дария» МКК ғимараты, дәрігерлік амбулатория шарбағына 10, орталық саябаққа 15 түп қара тал, құм тоқтату мақсатында 40000 түп сексеуіл отырғызылды.

Жыңғылдылықтар 3,4 га аумақты 4 тонна қоқыстан тазартып, 16 түп жыңғыл отырғызды.

Өтесте сенбілікке жұмылған 210 адам балабақша алаңдарын тазалап, балалар ойын алаңдарына жаңарту жұмыстарын жүргізді. Ауыл айналасына 140 түп ағаш отырғызды.

Үштағанда өткен сенбілік кезінде 20 га аумақ 220 тонна тұрмыстық қатты қалдықтардан тазаланып, ауылға 500 түп сексеуіл, 90 түп жеміс ағашы отырғызылды.

Аядай ғана Тұщыбек ауыл тұрғындары тындырымды еңбегінің нәтижесінде 75 түп шыбық, 10 түп бұта, 9 шаршы метрге гүл отырғызылды.

Акция аясында Шебір 250 адамның көмегімен 350 түп ағаш, құм тоқтату мақсатында 48000 түп сексеуіл, 67 000 түп жүзген, 5000 түп жыңғыл егілді.

Жармыш ауылында өткен сенбілік нәтижесінде ауыл ішіндегі ғимараттар сырланып, 5 га аумақтан 6 тонна қоқыс арнайы орынға төгілді. Акция аясында 47 түп ағаш отырғызылды.

Сенбіліктен шет қалмаған ондылықтар 10 га аумақтан 1000 тонна қоқысты шығарып, акция кезінде 50 түп ағаш отырғызды.

Маңғыстау ауданы бойынша өткен аптадағы сенбілікке 1692 адам қатысып, арнаулы 13 техника көмегімен 65,4 аумақ тазаланды. 161 708 ағаш шаншылып, 87 шаршы метрге гүл егілді.

Ауыл көркін ажарландыру мақсатында акцияға атсалысқан аудандықтардың еңбегі еш кетпей, еккен ағаштары жасыл желекке айналады деген сенімдеміз.

Өз тілшіміз

Көрнекі сурет сайттың архивінен

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.