Түпқарағандықтар Амал мерекесін атап өтті

Түпқараған ауданы Ақшұқыр ауылының теңіз жағалауында 14 наурыз Амал күніне орай «Амал келді, Жыл келді!» атты шарасы өтті, - деп хабарлайды mangystaumedia.kz сайты аудан әкімдігіне сілтеме жасап.

Шараға Түпқараған ауданының әкімі, ауыл ардагерлері мен тұрғындары қатысты. Аудан басшысы Рахат Елтизаров пен жиналғандарды көктемнің жайма шуақ, шұғылалы мерекесімен құттықтады.

- Бұл мереке — күн мен түннің теңелген тұсында, қыстың қыспағы мен қиындығынан аман-есен шығып, Наурыз мерекесі алдында халықтың мәре-сәре болатын күндерінің бірі. Көрісу — ағайын мен туыс арасындағы байланысты бекітетін тамаша дәстүр. Көненің көзі — қарияларға құрмет көрсетіліп, інілік ізет, дархан пейіл танытудың үлгісі. Олай болатыны, Амал – елдік, халықтық мейрам. Бұл күні бірлік күшейеді, береке молаяды. Амал мейрамы – өткенді саралап, болашағымызды болжайтын таразы. Осындай игілікті сәтте береке-бірлік, әрбір шаңыраққа денсаулық, бақыт пен шаттық тілеймін, - деді аудан әкімі Рахат Елтизаров.

Мерекелік шара барысында ауыл өнерпаздарының дәстүрді дәріптеу бағытындағы қойылымдар сахналанды.

Сондай-ақ «Амал» мерекесі Таушық, Қызылөзен ауылдарында мерекелік шаралар өз деңгейінде аталып өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.