Ақщұқырда қоқыс өртесең, айыппұл салынады

Ақшұқыр ауылының тұрғындарына қоқыс өртегені үшін айыппұл салынатыны туралы түсіндірме жұмысы жүргізілді, деп хабарлайды mangystaumedia.kz облыстық ҚКО-ға сілтеме жасап.

Бұл туралы аталған елді мекен тұрғынының облыс әкімдігінің телеграм каналына жолдаған шағымына жауап берген Ақшұқыр ауылының әкімі Еркебұлан Жәнібек мәлімдеді.

Желі қолданушысының айтуынша, ауылда қоқыс салатын жер жоқ екен. Сондықтан тұрғындар қоқыстарды өртейтін көрінеді. Тұрғындар өртеген қоқыстың иісінен жазда терезелерді аша алмаймыз деп отыр. Сол үшін желі қолданушысы қоқыс салатын жәшіктерді көбейтіп, қоқыс өртейтін адамдарға айыппұл салуын сұраған.

Ауыл тұрғынының шағымына Ақшұқыр ауылының әкімдігі дер кезінде жауап берді. Жауаптылардың мәлімдеуінше, Ақшұқыр ауылы бойынша тұрмыстық қатты қалдықтар салатын контейнерлерге арнайы қоршауы бар алаң жасалуда.

- Мамыр айында қосымша контейнерлер қойылады. Қоқыстарды өртемеу бойынша тұрғындарға түсіндіру жұмыстары жүргізіліп келеді. Айыппұл да қарастырылған, - дейді Ақшұқыр ауылының әкімі Еркебұлан Жәнібек.

Әкімшілік кодекстің 336-бабына сәйкес айыппұл сомасы жеке тұлғаларға - 20 АЕК немесе 61260 теңге, шағын бизнес үшін - 200 АЕК, ал ірі бизнес үшін 500 АЕК. Мұндай әрекеттерге Кодекстің 410-шы "Өрт қауіпсіздігі ережелерін бұзу" бабы қолданылуы мүмкін. Бұл үшін 5 АЕК мөлшерінде айыппұл салынады, ал егер жыл ішінде тағы қайталанса, 10 АЕК немесе 30630 теңге айыппұл төленеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.