Түпқараған ауданының аумағында орналасқан білім беру ошақтары кітап оқу мәдениетін оқушыларға жаңаша үлгіде насихаттау бағытында жұмыстар жүргізуде. Мәселен, Ақшұқыр мектеп-лицейінде заманауи үлгіде «Оқуға құштар мектеп» фойесі жасақталған.
Мектеп-лицейде жасақталған арнайы фойеде кітап сөрелері қойылып, олар түрлі дизайнмен әрленген. Оқушылар қоңырау кезінде кітаптарды алып, оқи алады.
Мұғалімдердің демеушілігімен сөреге қазақ ертегілері, қазақ және әлем әдебиетінің классикалық шығармалары қойылған. Сонымен қатар, аталған орында электронды кітаптардың стенді бар. Оқушылар смартфоны арқылы арнайы QR кодты сканерлеп, қаламгерлердің үздік туындыларын оқи алады.
- Мемлекет басшысы Қасым-Жомарт Тоқаевтың Ұлттық қоғамдық сенім кеңесінде берген тапсырмасына сәйкес БҒМ «Оқуға құштар мектеп» жобасын бекіткен болатын. «Оқуға құштар мектеп» жобасының аясында көркем әдебиеттер тiзiмi 4 бағыт бойынша жүзеге асуда. Яғни олардың қатарына еліміздің үздік классиктернің кітаптары, ана тіліне аударылған шетелдік әлем әдебиетінің жауһарлары, сонымен бірге қазіргі заманғы ақын-жазушылардың кітаптары енген. Білім берудегі кітап оқуға үйрету мәселелері әрдайым маңызды болғанымен, оқу сауаттылығын дамыту тапсырмасы ҚР-ның мемлекеттік білім беру стандартын жүзеге асыратын заманауи мектеп үшін жаңа сала болып табылады. Бұл бағытта Ақшұқыр мектеп-лицейінің арнайы фойесін атап өтсек болады. Бұл оқушылардың кітап оқуға деген мотивациясын оятып, тіл байлығын дамытуға себеп болады. Осы арқылы қоғамда кітап оқушылардың санын көбейтіп, оқырмандардың санын арттыру мақсат ретінде алынды,- деді Түпқараған ауданы бойынша білім бөлімінің басшысы Айбаршын Утесбаева.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
