Қарақия ауданындағы Құрық мектеп-гимназиясының Серікболтану кабинетінде оқу-ағартушылық бағытта республикалық семинар басталды, деп хабарлайды mangystaumedia.kz
Мемлекет басшысы Қасым-Жомарт Тоқаевтың тапсырмасымен жүзеге асырылып жатқан «Оқуға құштар мектеп» бастамасы аясындағы шара "ЭксонМобил" компаниясының қолдауымен өтуде.
Екі күнге жалғасатын семинарды республикаға белгілі дәріскер Динара Сагадатова жүргізеді. Алғашқы күнгі дәріске аудан бойынша барлық мектептердің география пәнінің мұғалімдері қамтылды.
- Мемлекет басшысының бастамасымен жүзеге асып жатқан бұл жоба екі бағытта өтеді: біреуі тікелей оқушылардың ғылыми сауатын арттыруға бағытталса, екіншісі ұстаздардың қосымша дағдылары мен сабақ барысында қолданатын ғылыми-танымдық ресурстарын кеңейтуді мақсат еткен. Яғни, оқушылардың ғылымға қызығушылығын ояту үшін әлемдік деңгейдегі сапалы әрі өзекті контенті бар онлайн және оффлайн ғылыми ресурстарды арнаулы сертификатталған тренерлер таныстыратын болады, деді семинарды ұйымдастырушы, "NATIONAL GEOGRAPHIC" журналы редакциясының өкілі Жомарт Қадыров.
Әлеуметтік жауапкершілік бағдарламасы аясында "ЭксонМобил" компаниясының қолдауымен қолға алынған жобаның негізгі мақсаты – әлемдік деңгейдегі сапалы ғылыми контенттердің қазақ тіліндегі қолжетімділігін кеңейте отырып, оқушылардың практикалық дағдыларын дамыту. Өйткені, білім беру саласындағы халықаралық салыстырмалы зерттеулер (PISA, PIRLS, TIMSS) нәтижесі (2018 жыл) еліміздің білім беру жүйесі алдында оқушыларымыздың функционалдық сауатын, яғни алған білімін өмірде қолдана білу қабілетін жақсарту бойынша маңызды міндеттер тұрғанын көрсетті.
- Аталған семинар-тренингтер барысында мұғалімдер мен оқушыларға әлемдік сападағы оқу-ағартушылық ресурстарды бағдарламаға қосымша пайдалану жолдары мен пәндік ғылыми жобалар жасау кезінде қолданудың практикалық әдіс-тәсілдері көрсетіліп, оқушылардың сөйлеу, креативті ойлау, үйренген нәрсесін іс жүзінде қолдану, шешім қабылдай білу сынды машықтары мен дағдыларын жетілдіретін нақты тапсырмалар орындалады, - дейді Д.Сағадатова.
Айтуынша, жоба аясында қазақ тіліндегі сапалы контентке қолжетімділікті кеңейту жұмыстары да жүргізіліп жатқан көрінеді. Мысалы, NATIONAL GEOGRAPHIC журналының қазақ тіліндегі жиынтық топтамаларымен республика мектептерінің кітапханаларын, соның ішінде Маңғыстау, Батыс Қазақстан, Атырау және Қызылорда облыстарының мектептеріне журнал топтамалары тегін тапсырылуда.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
