Кадрлық өзгерістер баяндалып, марапаттар тапсырылды

Аптаның дүйсенбісінде аудан басшыларының аппарат кеңесі өтті. Жиынды аудан әкімінің міндетін атқарушы Нұрлыбек Жолбаев жүргізіп, Мұнайлы аудандық ішкі істер басқармасындағы кадрлық өзгерістерді баян етуден бастады.

Сонымен Маңғыстау облысы ішкі істер департаменті бастығының 2018 жылғы 29 тамыздағы №416 бұй­рығымен Мұнайлы аудандық ішкі істер бөлімі бас­тығының міндетін атқарушы болып Рашид Қуандықов бекітілді. Ал осы бұйрық негізінде Мұнайлы аудандық ішкі істер бөлімі бастығының орынбасарлығына Аман­тай Өркенбаев тағайындалса, Маңғыстау облысы ішкі істер департаменті бастығының 2018 жылғы 24 та­мыздағы №408 бұйрығымен Мұнайлы аудандық ішкі істер бөлімі бастығының орынбасары қызметіне Еркін Чунетов тағайындалды.

Аудан әкімінің міндетін атқарушы Н.Жолбаев жаңа лауазымға тағайындалған басшылардың өмірбаяны­мен таныстырып, істе­ріне сәттілік тілегеннен соң Ақтау қаласында өткен V Каспий самми­тінің өткізілуіне айрықша атсалысқан азаматтар­ды марапаттады. Атап айтсақ, Маңғыстау облы­сы әкімінің Алғыс хаты Басқұдық ауылдық округі әкімі Өсер Тлеповке, ау­дандық жер қатынас­тары бөлімінің басшысы Әлібек Өтегеновке, «Маңғыстау жылу» МКК басшысы Бекбол Қазақ­баевқа, аудандық ха­лықты жұмыспен қамту орталығының қызметкері Мақсат Алигуловқа табыс­талды.

Марапаттаудан соң аппарат кеңесі күн тәртібіндегі мәселелерді қарау үшін өз жұмысын жалғастырды.

Өз тілшімізден

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.