Маңғыстау аудандық мәдениет үйінде жұмыссыз азаматтардың өндірістік кәсіпорын өкілдерімен кездесуі өтті, деп хабарлайды mangystaumedia.kz аудан әкімдігінің баспасөз қызметіне сілтеме жасап.
Аудан әкімі Ғалымжан Ниязовтың айтуынша, бұл кездесу бірқатар мәселелерді шешуге, сондай-ақ жұмысқа орналасу үдерісін жеделдетуге көмектеседі.
-Осындай кездесулер өте маңызды. Өйткені жұмыссыз жандар белгілі бір мамандықтың ерекшеліктері мен жалақы деңгейі және әлеуетті жұмыс берушінің талаптары туралы тікелей біле алады. Сондай-ақ, әлеуетті жұмыс берушілердің ұсыныстарымен таныса алады, - деді аудан әкімі.
Мұндай кездесудің маңызы зор. Мәселен, осындай кездесулер арқылы 2022 жылы Маңғыстау ауданында 112 адам жұмысқа орналасты.
Осы бағыттағы көрсеткіштерді жақсарту мақсатында кездесуге мүмкіндігінше көп кәсіпорындардың өкілдері шақырылады. Бұл жолы мәдениет үйінде 20-дан астам компания өкілдері жиналды. Олардың ішінде «Маңғыстаумұнайгаз» АҚ, «СП Арман» және «Oil Services Company», «Қарақұдықмұнай», «Сaspian food», «Кенсары» жауапкершілігі шектеулі серіктестіктері де бар.
Сонымен қатар, кездесуге облыстық жұмыспен қамтуды үйлестіру және әлеуметтік бағдарламалар басқармасының басшысы Әсет Шопанов, аудан прокурорының орынбасары Талғат Даутбаев және ауыл әкімдері мен азаматтық қоғам өкілдері қатысты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
