Бейнеу ауданында үздік жас мамандарға «Жастар премиясы - 2022» сыйлығы табысталды, деп хабарлайды mangystaumedia.kz Қоғамдық коммуникация орталығына сілтеме жасап.
Арнайы комиссия құрамы жеңімпаздарды анықтап, шарада салтанатты түрде жариялады. Бұл шара жастарды отансүйгіштікке, еңбекқорлыққа тәрбиелеу және де елдің қоғамдық-саяси, мәдени, экономикалық өмiрiне деген белсендiлiгiн арттыру, дарынды жастарға қолдау көрсету мақсатында ұйымдастырылып келеді.
Әр салада жоғары жетістіктерге қол жеткізіп, сыйлыққа ұсынылған азаматтар 14-29 жас аралығындағы жастардан іріктеліп алынды. «Үздік жас құқық қорғау саласының қызметкері» номинациясы Нұрғиса Нұрланұлына, «Үздік жас әскери сала қызметкері» номинациясы Нұрасыл Кумароваға, «Үздік жас дарын» номинациясы Едіге Қанағатұлына, «Үздік студент» номинациясы Әділ Бүркітбаевқа табысталды.
Ал «Үздік жас мәдениет қызметкері» номинациясы Айсұлу Анесоваға, «Үздік жас спортшы» номинациясы Еркебұлан Исламғалиға, «Үздік жас өндіріс және техника саласының қызметкері» номинациясы Нұрболат Ерболға, «Үздік жас кәсіпкер» номинациясы Сүлеймен Серіковке, «Үздік жас дәрігер» номинациясы Меруерт Қияновақа, «Үздік жас ерікті» номинациясы Бекарыс Жұмабаевқа, «Үздік жас тәрбиеші» номинациясы Бағила Шеркешбайға, «Үздік жас мұғалім» номинациясы Жансая Кашкеноваға, «Үздік жас теміржолшы» номинациясы Айдос Бөлекбаевқа, «Үздік жас өрт сөндіруші» номинациясы Есболат Ізтелиевке, «Үздік жас мемлекеттік қызметкер» номинациясы Балуанияз Демеуовке берілді.
-Жастар әрқашан да жаңа серпіліс пен жаңа бастамалардың ұйытқысы. Жастар қоғамдық дамудың негізгі күші. Әрине маман көп, белсенді жастар көп. Дегенмен «Жүзден жүйрік, мыңнан тұлпар» дегендей, ең мықты, ең үздік деген азаматтарды марапаттау басқа да жастарды жігерлендіріп, қозғау салады деп ойлаймын. Бұл марапат сіздердің адал қызметіңізге, қарым-қабілетіңізге, еселі еңбегіңізге берілген әділ баға, - деді аудан әкімі Бейнеубек Әбілов.
Үздік жастарға арнайы диплом мен естелік сыйлықтар табысталды. Салтанатты шара аудан өнерпаздарының мерекелік концертіне ұласты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
