Терең ойлы естелік-эссе

Меңдеш Салиховтың «Жизнь в эпоху перемен, не нефтью единой...» естелік-эссесі 500 дана таралыммен Алматыдағы «Полиграфкомбинат» баспасынан жарық көріп, жуырда тұсаукесері өтті.

Бұл кітапты мен өмірлік және іс­-тәжірибелік бай қоры жинақталған, мемлекетіміздің саяси ахуалына салмақты көзқарасы қалыптасқан, қазақша айтқанда «көпті көрген, топты көрген» адамның көпшілік мақұлдауға лайық ой-­пікірі, түсінік­-тұжырымы деп бағалар едім.

Мамандығы – мұнайшы, экономика ғылымдарының кандидаты, саяси ғылымдар жоғары оқу орнын бітірген, оның үстіне ұзақ жылдар өндірісте, партия-­кеңес саласында басшылық қызмет еткен адамның өмірлік ұста­нымы мен жеке көзқарасының көпші­лік түсінік­-танымымен қабысып, та­бысып отыруы оның халықшылдығын, отансүйгіштігін айғақтайтын анық­тауыш деуге болады.

Бұл кісі мұхиттың арғы бетіндегі демократияшыл мемлекетте 3 жыл өмір сүріп, капиталистік және социалистік екі формацияның ара-­жігін көзбен көріп, көңілмен түйсінуі – адами, азаматтық болмысын айқындай түскен сынақ жолы секілді көрінді.

Көпшіліктің көкейінде түйткіл болып жүрген көптеген сұрақтардың шешімі осы кітап беттеріндегі дәйектер мен деректерден, сындар мен сараптама­ талдаулардан табылады деп сенемін. Бұл – кітаптың тарихи­-құжаттық, зерт­теу-­дереккөздік құнын арттыра түсетіні сөзсіз.

Кітаптың бас кейіпкері тек өткен ғасырдың 90-­жыл­дары елдің талан­-таражға түскен та­биғи байлығы мен білімсіздік пен тәжі­рибесіздіктен құл­дырай бастаған эко­номикасына білікті маман ретінде алаң­даушылық білдіріп қана қоймайды, ол – шетелмен қарым­қатынаста инвести­циясының оң жолға түсуіне тікелей араласқан іскер – бітімгер.

Кітап қысқа естелік-­эссе түрінде жазылған, оқылуы жеңіл, ойы терең. Қоғамдық-­саяси, әлеуметтік оқиғаларды талдап, баяндау барысында кітаптың өне бойынан шындықтың шымырлаған жылғасы жұлын омыртқадай тұтаса ағып жатқаны көзге көрініп тұрады және ол шындық, айғақтар жалаң сөз емес, нақты сандармен айшықталса, оқырманның кітап авторына деген сенімі мен ілтипатын арттыра түсері анық.

Кітапты ашқаннан оқырманмен ашық ой бөлісе бастайтын, жаратылысында­ғы қазақы қасиетті сақтай отырып, қазіргі заманға лайық жалпы адамзат­тық ұстанымдар мен адамгершілік құн­дылықтарды бойына сіңіре білген, білім мен ғылымның жаңалық­жетістіктерін назардан тыс қалдырмайтын парасат­-пайымы жоғары азаматтың жеке тұлғасы жастарға үлгі­-ұстын деп қа­былдауға негіз бар.

Оның 11-ші­ - «Ой­ пікір сандығы­нан» бөлімінде ел басқарушыларға өзінің елді көркейтуге тиіс деген ой­пікірлерін бүкпесіз ортаға салуы, әр аймаққа қа­тысты ақыл­ кеңесімен бөлісуі – нағыз отансүйгіш азаматтың ісі деуге лайық.

Автордың өз ойларын жалтақтамай, тура, ашық айта білуі – оның батылдығы мен өзіне сенімінің куәсі.

Жалпы алғанда, бұл – шынның жүзіне тура қарап оқырманмен ой бөліскен сирек кітаптардың бірі. Сондықтан авторға денсаулық және шығармашылық табыс тілейміз!

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.