Мұнайлы ауданындағы Қызылтөбе ауылында «Тұран» атты жаңа өнер - білім орталығы ашылды. Орталықтың мақсаты - ауыл жасөспірімдерін өнерге баулып, олардың бос уақыттарын тиімді пайдалануға атсалысу, деп хабарлайды mangystaumedia.kz сайты.
Қазір бұл орталықта 10 мұғалім білім беріп, 150 -ге тарта оқушы тәлім алуда. Мұнда келген жастар домбыра, вокал, фортепиано, гитара, хореография сынды 5 үйірмеге қатысады алады.
Орталық жетекшілерінің айтуынша, олар мұнымен тоқтап қалмай ата-бабадан мирас болған ұлттық болмыс пен ұлттық құндылықтарды жастарға үйрету жолында құлшына еңбек етеді. Сонымен бірге, «Тұран» атауымен ұлттық аспаптар жасайтын шеберхана ашуды көздеп отырғанын айтты. Шеберханада оқушылары өзі қалаған аспаптарды қолдан жасап, сынған аспаптарын ретке келтіру мүмкіндігі болады.
Айта кетейік, қараша айында жұмысын бастаған орталық ақпан айында ресми түрде ашылу салтанатын өткізді. Қысқа уақыт ішінде үйірмеге қатысқан ауыл жастары көңіл қуантарлық жетістіктерге жетіп үлгерген.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
