Бүгін 19 А шағын ауданында орналасқан енді ашылатын №24 мектеп қызметкерлері «Таза Қазақстан» эко-кампаниясына қатысып, мектеп ауласын тазалады, - деп хабарлайды mangystaumedia.kz.
Мектептің 42 қызметкері, оның ішінде мектеп мұғалімдері де бар, тазалық жұмыстары кезінде мектеп ауласындағы қалдықтарды жинап, жел ұшырып әкелген құм мен пластик бөтелкелерді қоқыс жәшігіне салған. Қоқыс жинап қана қоймай, мұғалімдер мен қызметкерлер ауладағы көгалды суарған.
- «Таза Қазақстан» эко-кампаниясы аясында экологияны таза ұстау және адамдардың арасында экологиялық мәдениетті нығайту үшін мектеп айналасын тазаладық. Болашақта мұндай жұмыстар міндетті түрде жасалады. Таза жерде, таза қоғамда өмір сүру, ең бірінші, адамның ішкі, жан қалауы, - дейді мектеп директоры Әлібек Баймұратов.
Директор қызметкерлердің құлшына жұмыс істеп, соңында бәрі бір-біріне, жасаған тазалық жұмысына риза болып тарқасқанын айтады.
Жаңа мектептің ашылуы қыркүйектің бірі - Білім күніне жоспарланып отыр. Екі ауысым бойынша оқытатын мектептің сыйымдылығы 1200 балаға арнап салынған. Іші және сыртқы тазалық жұмыстарынан бөлек, мектеп жаңа оқу жылына 100 пайыз дайын.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
