Ақтауда облыстық Н.Жантөрин атындағы облыстық музыкалық драма театрының құрылғанына 20 жыл толуына орай баспасөз конференциясы өтті, деп хабарлайды mangystaumedia.kz.
Баспасөз мәслихатына облыстық мәдениет басқармасының басшысы Әбілқайыр Байпақов, драма театрдың директоры Гүлсина Мирғалиева, көркемдік жетекші Медғад Өмірәлиев, театр негізін қалаушы Нұрнияз Мұханов, М.Әуезов атындағы академиялық театрдың директоры Еркін Жуасбек, Халық әртісі Асанәлі Әшімов қатысты.
«Биыл Маңғыстау театры үшін айтуыл жыл. Сонымен бірге, облыстың құрылғанына 50, Ақтау қаласына 60 жыл толып отыр. Н.Жантөрин атындағы музыкалық драма театрының өз жұмысын бастағанына 20 жыл толып отыр. Біздің театрдың мерейтойына арнайы келген құрметті қонақтарымызға шын жүректен алғысымызды білдіреміз. Алғашқы келген театр труппасы өнер ұжымының деңгейін көтерді. Өнерде 20 жыл көп уақыт болмауы мүмкін. Бірақ осы уақыт аралығында теккен тер өз жемісін берді. Оған дәлел түрлі театр фестивальдерінде өнер ұжымы бірнеше рет жүлделі оралды», - деді Мәдениет басқармасының басшысы Ә.Байпақов.
Бұдан бөлек, қазақ театр өнерінің марғасқасы Асанәлі Әшімов сөз алды. Ол Маңғыстау өңіріне жиі келетінін, сонымен бірге, әр сапарында театрдың көркемдік деңгейі өсіп келе жатқанын атады.
Барлығыңызды бүгінгі ұлы мейраммен құттықтаймын. Бұл Қазақстандағы ең жас театр болғанына қарамастан өзін дәлелдей алды. Өнер академиясын бітірген жастардың жұмысқа келуімен құрылды. Қазақтың алғашқы театры Қызылордада ашылғанда оған қажетті әртістердің еліміздің әр өңірінен алып келді. Маңғыстау театрына да әртістер еліміздің әр аймағынан келді. Олардың барлығы Алматыда өнер академиясында білім алды. Былтыр академияны бітірген үш шәкіртім осында жұмыс істеп жатыр. Оның біреуі осы өңірдің тумасы. 20 жыл бұрын театр ашылғанда сөз сөйлеп тұрып, сол кезде облыс әкіміне театр әртістерін ұстап тұру үшін бір жылға жеткізбей үймен қамтуды айтып, сөзін алып едік. Кейін ол 4 ай өткенде телефон соғып, баспана мәселесі шешілгенін айтқан. Содан бері театр уақытпен бірге түлеп, абыз актер Н.Жантөриннің есімін иеленді», - деді Асанәлі Әшімов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
