Маңғыстаулық ауыл шаруашылық субъектілері жем-шөп тасымалына 50% жеңілдік ала алады

Бұл туралы бүгін облыс әкімінің орынбасары Қанат Құлжанов Сенат депутаттарының қатысуымен "Атамекен" ҰКП-да өткен шағын және орта кәсіпкерлікті дамыту мәселелері бойынша көшпелі отырыста айтты. Жиынға сенаторлардан бөлек салалық кеңес мүшелері, бизнес өкілдері мен жергілікті әкімдік қызметкерлері қатысты, деп хабарлайды mangystaumedia.kz сайты.

Отырысқа ҚР Парламенті Сенатының Экономикалық саясат, инновациялық даму және кәсіпкерлік Комитетінің төрағасы Сүйіндік Алдашев төрағалық етті.

- Маңғыстауда ШОБ қарқынды дамуда. Соңғы 5 жыл ішінде өндірілген өнім көлемі 50% артқан. Өңірде ШОБ-пен айналысып, жақсы нәтижеге жеткен кәсіпорын жетерлік. Солардың бірі жақында өткен халықаралық "Mondial du Formage-2023" байқауында үздік деп танылған – "Жеті лақ" шаруа қожалығы,- деді С. Алдашев.

Биылғы жылдың 1 мамырындағы есеп бойынша өңірде жұмыс істеп тұрған ШОБ субъектілерінің саны 82 мыңға жеткен. Бұл өткен жылдың осы кезеңімен салыстырғанда 34%-ға өскенін көрсетеді. ШОБ-та жұмыспен қамтылғандар саны 155 мың адамды құрады. Оның 45 мыңы – әйел. Мәселен, "Бір ауыл – бір өнім" жобасы аясында Қарақия ауданының Құрық ауылында 40 жұмыссыз әйел жүн өнімдерінен түрлі бұйымдар жасауда. Тауарлар ел ішіне және шет елдерге де экспортқа шығарылады. Осыған дейін кәдеге аспай жатқан жүндер өңделіп, бүгінде түрлі бұйым жасалуда, әрі табыс көзіне айналды. Пилоттық жобаның қорытындысы бойынша Құрық ауылы «Бір ауыл-бір өнім» жобасын іске асырған жалғыз өңір атанып, Маңғыстау облысы көшбасшы болды.

Сондай-ақ облыста салалар бөлінісінде жұмыс істеп тұрған ШОБ субъектілерінің басым бөлігі – сауда бойынша тіркелген, барлығы – 28 442 бірлік. Ал ең аз көрсеткіш – мемлекеттік басқару және қорғаныс бағыты бойынша, жалпы саны – 14.

- Үкімет қабылдаған Жол картасы аясында облыс әкімдігі, «Атамекен» ҰКП, «Самұрық-Қазына» ҰӘҚ» АҚ өкілдері бірлесіп, сатып алуды оқшаулау бойынша бизнес-жобаларды алдын ала іріктеу үшін жұмыс тобын құрды. 700-ден астам жұмыссызды еңбекке араластыруға мүмкіндік берілді,- деді Маңғыстау облысы кәсіпкерлер палатасының директоры Рашит Мұстапаев.

2023 жылдың 1-ші жартыжылдығында Кәсіпкерлер палатасы бизнес өкілдерініңң құқықтарын қорғау және әкімшілік кедергілерді жою бойынша 85 өтініш қарады. Оның 41-і толық шешімін тапты.

Отырыс барысында жалпы көрсеткіштерден бөлек, кәсіпкерлердің мәселелері тыңдалды. Жиынға қатысушылар сұрақ жолдап, түйіткілді тақырыптарды шешуге көмектесуді сұрады.

- Ауыл шаруашылығы бойынша қарастырылатын мемлекеттік қолдау, яғни, субсидиялау – республикалық деңгейдегі ережелермен қабылданған. Көбіне Маңғыстаудың өңірлік ерекшеліктері мен климаттық айырмашылығы сәйкес келмей, жоба қолдау таппайды. Осы мәселені шешу үшін бізге ғылыми зерттеу институттарының көмегі қажет немесе өңірден филиал ашылғаны дұрыс. Мысалы, бордақылау басқа өңірлерде 1000-1500 бас деп көрсетілген, ал біздің өңірге санын 300-500 дейін азайтпаса, жағдай қиындай бермек. Сондай-ақ біздер ауыл шаруашылық жануарларына берілетін жем-шөпті өзге өңірлерден тасымалдаймыз. Екінші мәселе осыған байланысты. Тасымал құнына бұрын субсидия қарастырылатын, ал қазір - жоқ. Көп кәсіпкерге бұл кедергі болғандықтан осы сұрақты да қарастыруларыңызды сұраймын,- деді жиынға қатысушы кәсіпкерлердің бірі.

Бұл мәселеге қатысты облыс әкімініі орынбасары Қ. Құлжанов пікір білдірді. Оның айтуынша, климаттың ерекшелігіне байланысты ауыл шаруашылығының субъектілері өз мүмкіндіктерін толық пайдалана алмай отыр.

- Расында, бұл мәселелер – өте өзекті. Сондықтан министрлікке ұсыныс жолданып, қазір ережеге тиісті өзгеріс енгізу бойынша жұмыстар атқарылуда. Ал екінші мәселеге қатысты шөп тасымалы да шешілді деуге болады. Себебі Президент Маңғыстау облысына іс-сапары барысында тиісті тапсырма берген еді. "Қазақстан Темір жолы" АҚ біздің өңірге жем-шөп тасуға 3 қызмет бойынша келісім шартқа отырды. Қазірдің өзінде ауыл шаруашылығы субъектілері мүмкіндікті пайдаланып, жем-шөптерін 50% жеңілдікпен алдыруда,- деді облыс әкімінің орынбасары Қанат Құлжанов.

Айта кетейік, Маңғыстау облысының кәсіпкерлер палатасы жанынан құрамында жергілікті кәсіпкерлер бар 8 салалық кеңес құрылған. Осыған дейін олар 36 отырыс өткізіп, 67 мәселе қарады.

Өңірлік кәсіпкерлер палатасы Сенат депутаттарына 12 түрлі ұсыныс берді. Оның ішінде бизнестің дамуына қарама-қайшы келтіретін заңдарға өзгеріс енгізу туралы да айтылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.