Маңғыстауда жүк тасымалдаушыларға 5 миллион теңгеден астам айыппұл салынды

Маңғыстау облысы бойынша көліктік бақылау инспекциясының қызметкерлері «Назар аударыңыз! Қауіпті жүк» акциясы аясында 41 жүргізушіге 5 млн 360 мың теңге айыппұл салды, - деп хабарлайды mangystaumedia.kz сайты.

Рейд барысында департамент қызметкерлері 90-ға жуық автокөлікті тексерді. Қауіпті жүктерді тасымалдау ережелерін бұзғаны үшін 14 тасымалдаушыға 760 мың теңге әкімшілік хаттама толтырылды.

"Бұл ҚР Көлік министрлігінің Автомобиль көлігі және көліктік бақылау комитеті ұйымдастырған акцияның мақсаты - жүктерді тасымалдау қауіпсіздігін және ҚР-ның көлік заңнамасының сақталуын қамтамасыз ету. Рейд барысында инспекторлар көлікті тіркеу құжаттарының, жол парақтарының, жүргізушіге арналған нұсқаулықтардың, қауіпті жүктерді тасымалдауға рұқсат беру актінің болуын тексерді», - деді Маңғыстау облысы бойынша көліктік бақылау инспекциясы» басқармасының басшысы Жалғас Нұржаубеков.

Оның айтуынша, биыл 7 айда инспекция қызметкерлері 2 мыңға жуық ауыр жүк көлігі жүргізушілерін тексерген. Рейдтік шаралар нәтижесінде 880 жүргізушіге 98 миллион теңгеден астам айыппұл салынды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.