Былтыр 100 мыңнан астам маңғыстаулық тісін тегін емдеткен

Маңғыстауда 2022 жылы МӘМС аясында 109 133 тұрғынға, соның ішінде 79 980 балаға тегін стоматологиялық қызмет көрсетілген, деп хабарлайды mangystaumedia.kz.

Маңғыстау облыстық стоматология орталығының директоры Қуат Машырықов емханада міндетті әлеуметтік медициналық сақтандыру (МӘМС) және стоматология бойынша тегін медициналық көмектің кепілдік берілген көлемі (ТМККК) аясында қызмет көрсетілетіндігін мәлімдеді. 1-шағынаудандағы облыстық стоматология орталығы - өңір бойынша стоматологиялық қызметтердің барлық түрлерін көрсетуге лицензиясы бар жалғыз емхана.

- Бүгінде тіс емханасында 136 маман қызмет етеді. Емхана мемлекеттің жіті бақылауында болғандықтан медициналық қызмет құнының шегі белгіленген. Мәселен, емханада ең төменгі баға 5000 теңгеден басталады. Брекет салдыру секілді ортодонтиялық қызметтер ақылы, - деді Қуат Машырықов.

Сондай-ақ, «Алтын алқа» және «Күміс алқамен" марапатталған көпбалалы аналар мен әлеуметтік көмек алатын жандарға 10%-дан 20%-ға дейін жеңілдіктер көзделген. Сонымен қатар, 18 жасқа дейінгі балаларға және жүкті әйелдерге жоспарлы түрде тегін стоматологиялық көмек көрсетіледі.

Қуат Машырықов стоматологиялық орталықта былтыр 2101 жүкті әйел тегін емделгендігін атап өтті Солардың бірі - Ақтау қаласының 31 жастағы тұрғыны Жанар Қамидолла.

- Жүктілігімнің 30-аптасында тіс ауруы мазалап, дереу облыстық стомотологиялық орталық көмегіне жүгіндім. Тіс дәрігерлері жедел көмек көрсетіп, 2 күннен кейін уақытша пломба орнатып берді. Дәрігерлердің науқаспен қарым-қатынасына ризамын, - дейді тұрғын.

Айта кетейік, тұрғындар таңғы сағат 8:00-ден кешкі 20:00-ге дейін және түнгі сағат 24:00-ге дейін кезекші дәрігер көмегіне жүгіне алады. Ал, тіс емдеу бағалары «Stom – mangystau.kz» сайтында көрсетілген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.