Батыр ауылы тұрғындарының коммуналдық шаруашылық жұмысына көңілі толмайды. Бес жыл бұрын орнатылған су құбыры үш жылдан бері тоқтап тұр. Ауыл тұрғындарының айтуынша, аптасына екі рет болса да уәде етілген су берілмейді. Күнде түрлі сылтау мен себеп. Бірде бұзылып қалды, жөндеп жатыр немесе қысым болмай жатыр дейді. Бірақ шоттарды ай сайын төлеуге тура келеді, - деп хабарлайды mangystaumedia.kz сайты.
- Есептегіш құдықта айналып жатыр. Ал оның ішінде су жоқ. «Маңғыстау жылу» мекемесіне хабарластық, олар бұл сіздің жауапкершілігіңіз, төлеу керек дейді. Сонда ауаға төлеу керек, - деп ауыл тұрғындары шағымданады.
Үш жылдан бері сусыз отырмыз. Жақында депутаттар Сарбақов, Әвезов, Сәдуақасовқа хабарластық. Олардан қақпағын сатып алып беруін сұрадық. Біз оларға дауыс бердік. Дұрыс па? Дұрыс! Сондықтан халыққа игі іс жасауын сұрадық. Қақпағын орнатқан күні суым келді. Үш жылдан кейін. Болды! Бір рет қана, – дейді Батыр ауылының тұрғыны Линда Жұмағаметова.
Құдықтағы судың орнына ауаға ақы төлеумен қатар, тұрғындар суды купон арқылы өздері сатып алуға мәжбүр. 4 текшені 680 теңгеге сатып аламыз, сонымен қатар жеткізу үшін жүргізушіге 2000 теңге төлеу керек. Талондар пошта бөлімшесінде беріледі, ол жерден коммуналдық кәсіпорынға барып, су жеткізуге жазылу керек. Бірақ оның жеткізу мерзімі 10 күнге дейін созылуы мүмкін. Сондықтан ауылда жеке су тасушылар белсенді жұмыс істеп жатыр. «Жеке саудагерлер» сияқты олардың бағасы да қымбаттап жатыр. Бірақ олар тез жеткізеді.
- Суды аптасына екі рет беру керек еді. Бірақ, қандай да бір себептермен дәл осы күндері қақпақшасы бұзылады немесе басқа нәрсе болады. Менің ойымша, бізді су сатып алуға мәжбүрлеп жатыр. Өткен аптада халық 4,2 текше метр су үшін 10 мың төледі», – дейді Батыр ауылының тұрғыны Құндыз Әжібаева.
Тұрғындармен кездесуге Мұнайлы ауданы әкімінің орынбасары Нұрхан Мұстафаев келді. Ол ешқандай сөз байласу болмағанын түсіндірді. «Каспий» тұщыту зауытында қуаттылық болмағандықтан су тапшы. Сонымен қатар әкімдік жеке саудагерлермен түсіндіру жұмыстарыр жүргізіп, бағаны шарықтатпауды, әйтпесе бақылауға алатынын айтты.
– Батыр ауылында сейсенбі, жұма күндері сағат бойынша су беріледі. Жалпы 22 мың текше метр су қажет. Бұған дейін «Каспий» тұщыту зауыты бізге 8-10 мың текше метр су берді. 20 шілдеден бастап ауылға арналған көлем 14 мың текше метрге дейін артты. Қазір осы 14 мың текше метрді 7 ауылға бөліп жатырмыз. «Маңғыстау жылу» су тасымалдаушылары суды жеткізеді. Батыр ауылында жеке су тасымалдаушыларға суды 2680 теңгеден сату керектігі айтылды. Бұл жағдай уақытша. 10 рейс алады, 20 мың табыс табады. Ал егер суды 5-6 мыңға сататын болса, оларды бақылауға аламыз, - дейді Мұнайлы ауданы әкімінің орынбасары Нұрхан Мұстафаев.
Айта кетейік, аудан әкімдігі осы аптада су құбыры жұмыс істеп, тұрғындарға кесте бойынша аптасына екі рет су келеді деп уәде берді. Бұл уәдеге ауыл тұрғындары сенбей, жоғарғы органдардан ауданға су тарту процесіне қатысушылардың қызметін тексеруді сұрайды.