Ақтаулық таэквондошылар Еуразия чемпионатында рекордтық медаль санын жеңіп алды

TaeKwonDo GTF бойынша Қазақстан құрамасы 36 медаль жеңіп алды. Оның он төртін ақтаулық жаттықтырушы Бүркіт Исакұлы шәкірттерінің еншісінде, - деп хабарлайды mangystaumedia.kz сайты.

Чемпионат 28-29 қазан аралығында Кипр елінің Гирне қаласында өтті. Жарыста маңғыстаулықтар 9 алтын, 3 күміс, 2 қола медаль иеленді.

«Хенг» бөлімі бойынша Бүркіт Исакұлы, Әлихан Аман және Әлихан Қайратұлы жеңімпаз атанды. Ал Дархан Әли мен Ақылбек Дүйсенбаев екінші орынды иеленді. Жүлделі үшінші орын Ерасыл Ержанұлы және Данияр Жұмашевқа бұйырды.

"Массоги" аталымында Әлихан Аман, Дархан Әли, Әлихан Қайратұлы, Ерасыл Ержанұлы, Ақылбек Дүйсембаев және Данияр Жұмашев жеңіс тұғырының бірінші сатысына көтерілді. Күміс медаль Бүркіт Исакұлына бұйырды.

Командалық есепте бірінші орынды чемпионат қожайындары Кипр спортшылары иеленсе, медальдар саны бойынша Қазақстан құрамасына екінші орынды, Норвегия жауынгерлері үздік үштікті, ал төртінші орынға Молдова командасы тұрақтады. Чемпионатта әлемнің 11 елінен 500-ге жуық спортшы бақ сынасты.

"Бәсекелестік күшті болды, бірақ біз тек жеңіске жетуге бел будық. Бізге сенім білдірген барша тілекші жанға шын жүректен алғыс айтамын. Әсіресе, байрақты бәсекеге барып келу жолын көтерген ата-аналарға ерекше алғысымды білдіремін», - деді Маңғыстау облыстық "TaeKwonDo GTF" ұлттық федерациясының президенті Бүркіт Исакұлы.

Айта кетейік, таэквондодан бапкер Бүркіт Исакұлының қара белбеу ІІІ данға тапсырған емтиханнан сүрінбей өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.