Маңғыстауда балық шаруашылығын дамытуға басымдық беріледі

Бұл туралы Маңғыстау облысы "Атамекен" кәсіпкерлер палатасының алаңында өткен жиында айтылды. Алғашқы болып сөз алған Рашит Мұстапаев балықшылармен кездесу өткізу бұрыннан жоспарда бар екендігін атап өтті, - деп хабарлайды mangystaumedia.kz сайты.

Жиында балық өсіру мақсатында жер учаскелерін алу, балық өсіру шаруашылықтарын су қорғау белдеуінде орналастыру және Каспий теңізінен су тұтыну жөнінде құзыретті мемлекеттік органдармен пысықтау және түсіндіру жайлы айтылды.

Сонымен қатар қолданыстағы заңнаманы және мемлекеттік қолдау шараларын түсіндіру, оның ішінде балық өсіру шаруашылығын жүргізу кезінде субсидиялар алу және құжаттарды рәсімдеу тәртібі туралы жұмыстарды жандандыру мәселесі де назардан тыс қалмады. Өңірбе бүгінгі күні балық өсіру бойынша іске асып жатқан және жоспарланып отырған бірнеше инвестициялық жоба бар.

Маңғыстау облыстық балық шаруашылығы басқармасының басшысы Арман Молдашев мемлекеттік қолдаудың барлық қолданыстағы және жоспарланған шаралары туралы баяндама жасап, қолдау көрсетуге дайын екендігін жеткізді.

Бүгінгі басқосу өзара тиімді ынтымақтастық бойынша сындарлы ұсыныстар әзірлеуге мүмкіндік береді деп сенім білдірген ол, бүгінгі таңда балық шаруашылығын дамытудың 2030 жылға дейінгі бағдарламасы жүзеге асып жатқанын, оның шеңберінде балық өсірумен айналысатын субъектілер үшін қолайлы жағдай жасау, өзекті мәселелерді шешу және заңнаманы жетілдіру бойынша жүйелі шаралар қабылданатынын атап өтті.

Басқарма басшысының айтуынша, облыста 2021 жылы 610 балықшы тіркелген болса, 2022 жылдың 10 айында тіркелген балықшы саны 869 құрады. Балық аулау квотасының игерілуі 2022 жылдың шілдесінен – 2023 жылдың 30 маусымға дейін – 8528,0 тонна квота бөлініп, оның 568,3 тоннасы (6.6%) игерілді.

"Бүгінгі күні балық шаруашылығы саласында балық өсіру басым бағыт болып табылады. ҚР Үкіметінің 2021 жылғы 5 сәуірдегі № 208 қаулысымен Балық шаруашылығын дамытудың 2021 – 2030 жылдарға арналған бағдарламасы бекітілді. Бағдарлама шеңберінде Маңғыстау облысымызда 2030 жылға қарай жұмыс істеп тұрған балық өсіру шаруашылықтарын кеңейтіп, өсірілетін балықтың көлемін 100 000 тоннаға дейін жеткізу көзделіп отыр. Жыл басынан 37 тонна балық өсіру жоспарланған. Қазіргі уақытта, 38,5 тонна балық өсірілді", - деді ол.

Қазіргі таңда өңірде сумен қамтамасыз ету циклінің тұйықталған кешені арқылы бекіре тұқымдас және жайын балықтарды өсіретін үш кәсіпорын қызмет етуде. Атап айтқанда: «Kazakh osseter» ғылыми өндірістік кәсіпорны» ЖШС, «Каспиан Ривьера» ЖШС және «NATALI COMPANY» ЖШС.

Сондай-ақ, басқосуда инвестициялық және шаруашылық шығындарды субсидиялау, айналым қаражатын толықтыру үшін жеңілдетілген несиелендіруге қол жеткізу және технологиялық жабдық сатып алу бөлігінде мемлекеттік қолдау көрсету мәселелері де айтылды.

Жиынға қатысушылар баяндамашыларға және табиғат пайдаланушыларға сауалдарын қойып, өздерінің ұсыныс-пікірлерін ортаға салды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.