Ақтауда танымал журналист, жазушы Мұқтасын Сухамбердиев тұрған 12- шағынаудандағы 69-үйдің сыртына ескерткіш тақта орнатылды, деп хабарлайды mangystaumedia.kz.
Мұқтасын Сухамбердиев 1957 жылға дейін “Орал” облыстық газетінің тілшісі болып, 1961 жылдың жазында Жетібай жерінде мұнай бұрқағы атқылағандығы туралы қуанышты хабарды естіп, кен орны турасында алғаш мақала жазды. 1965 жылы Жоғары партия мектебін бітіріп, жолдамамен қазіргі Ақтауға қоныс аударады. Сол тұста Юрий Татарин басқарған “Огни Мангышлака” газетіне жұмысқа орналасып, 1970 жылы “Жаңарған Маңғыстау” газетінің бас редакторлығына тағайындалады. 1973 жылы Маңғышлақ облысы құрылғаннан кейін, “Коммунистік жол” газетінде сегіз жыл бойы қызмет атқарады. 1984-1992 жылдары “Социалистік Қазақстан” республикалық газетінің меншікті тілшісі ретінде қызмет еткен.
Мұқтасын ағамыздың өзекті мақалалары облыс аумағында іске асқан бірқатар игі бастамаларға түрткі болғаны рас. Соның бірі - 26-шағынауданда салынған ғимараттың облыстық ауруханаға берілуі. Халық саны артып, жаңа кен орындары барланып, атом станциясы, химия зауыты секілді инсдустрия нысандары салынып, өндірістік-аумақтық кешен өркендеген тұста тәжірибелі журналист бар қарым-қабілетін сарқа жұмсай білді.
“Саналы ғұмырын өңір баспасөзінің дамуы мен қалыптасуына арнаған Мұқтасын Сухамбердиев есімін ұрпақ жадында жаңғырту мен елеулі еңбегін насихаттау мақсатында ұйымдастырған ізгі бастамаға қолдау көрсеткен Ақтау қаласы әкімдігі мен өңірлік мәдениет басқармасына алғысым зор. Бұл өткенге құрмет пен ілтипат белгісі деп білемін”-, деді танымды іс-шараның өтуіне мұрындық болған “Маңғыстау-Медиа” ЖШС директоры Гүлмира Әбішева.
Қазақстанның құрметті журналисті, жазушы Мейрамбай Қибасов Мұқтасын Сухамбердиевтің азаматтық тұлғасы турасында сыр шертіп, “Мұқтасын ағаның баспасөз майданындағы мінсіз қызметі мен ұшан-теңіз еңбегі қандай да болсын құрметке әбден лайықты” деді. Ал ардагер журналист Маңдайлы Қосымбай “90 жылдық мерейтойы қарсаңында ескерткіш тақтаның орнауы қазақ журналистикасында қолтаңбасы қалған қарымды қаламгерге көрсетілген құрмет деп түйсіндік. Ендігі ретте Мұқаң, Асан Әбдіров, Терекбай Жаңбыршин секілді ілкі буын өкілдерінің атындағы арнайы сыйлықтар тағайындалса құптарлық іс болар еді”,- деген ойымен бөлісті.
Іс-шара соңында ардагер журналистің жұбайы Сәуле мен ұлы Асқар барлық ұйымдастырушылар мен қатысушыларға алғысын білдірді.