Ақтауда Шоқыр Бөлтекұлын еске алуға арналған халықаралық турнир өтеді

Ақтауда қыркүйек айының 20-24 күндері қазақ боксының негізін қалаушы, Қазақстан Республикасына еңбек сіңірген жаттықтырушы Шоқыр Бөлтекұлын еске алуға арналған ХV халықаралық турнир өтеді, деп хабарлайды mangystaumedia.kz Қоғамдық коммуникация орталығына сілтеме жасап.

Дәстүрлі жарысқа Қазақстан ұлттық құрама командасымен бірге Қытай, Түркия, Әзірбайжан, Грузия, Өзбекстан, Тәжікстан елдерінен спортшылар қатысады. Сонымен қатар, еліміздің барлық облыстары мен республикалық маңызы бар қалаларынан командалар келеді деп күтілуде. Сондай-ақ, аталмыш тартыс қараша айында өтетін Қазақстан чемпионатына дайындық есебінде өткізілетін болады.

Сайыстың ашылуы 20 қыркүйек күні сағат 14:00 – де ал, алдын-ала кездесулер сол күні 14:30 бен 21 қыркүйек сағат 14:00-де болады. 22 қыркүйек сағат 14:00 – де ширек финал, 23 қыркүйек сағат 14:00 – де жартылай финал, сондай-ақ, 24 қыркүйек сағат 12:00 – де финал өтеді. Жарыс 4 күн бойы «Халық Арена» спорт кешенінде болады.

Айта кетейік, биыл 15- рет өткізілгелі отырған жарыс Маңғыстау облысында бокс спортының дамуына зор ықпал етті. Оның айғағы ретінде әлемдік рингтерде топ жарып, көк байрағымызды желбіреткен жерлестеріміз Ердос Жаңабергенов, Әділбек Ниязымбетов, Берік Абдрахманов, Бекзад Нұрдәулетов, Ерік Әлжанов, Нұрбол Қалжанов, Санатали және Саматали Төлтаев әр жылдары Ш.Бөлтекұлы жарысының жеңімпаздары атанды. Боксшылар спорт шебері атағын орындап, тәжірибесін жетілдірді. Бұдан бөлек Маңғыстау құрама командасының үш рет «Конфедерация Кубогын» жеңіп, рекордтық көрсеткішке жетуіне де тікелей осы жарыстың себебі тиді. Бұл да турнирдің пайдасының бір айғақ белгісі іспетті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.