Ақтауда Наурыз мерекесіне орай 200 балаға сыйлықтар берілді

Ақтау қаласы әкімдігінің қолдауымен және «Мейірімді ана» қоғамдық қорының ұйымдастыруымен Наурыз мерекесіне орай 200 балаға сыйлықтар берілді. Олардың қатарында ерекше білім беру қажеттіліктері бар балалар мен көпбалалы және аз қамтылған отбасылардан шыққан балалар бар, - деп хабарлайды mangystaumedia.kz қала әкімдігінің баспасөз қызметіне сілтеме жасап.

Мерекелік кеште ән шырқалып, аниматорлар балаларға мерекелік көңіл-күй сыйлады. Балалар ұлттық ойындар ойнады. Атап айтқанда, қатысушылар асық атып, арқан тартысты. Шарада ерекше балаларға ұлттық киім мен тақия табысталды. Шараға Ақтау қаласының әкімі Ұлықбек Тналиев қатысып, балаларды Наурыз мерекесімен құттықтады.

- Наурызнама онкүндігінде көптеген мәдени, спорттық іс-шаралар өтіп жатыр. Наурыз мерекесі - түркі тілдес халықтардың ортақ мейрамы. Бүгінгі мерекелік шара ұйымдастырушысы «Мейірімді ана» қоғамдық қорына ризашылығымды білдіремін. Балаларға зор денсаулық, бақытты балалық шақ тілеймін. Ойлаған арман-мақсаттарыңызға жете беріңіздер. Наурыз мерекесі құтты болсын, - деді Ақтау қаласының әкімі Ұлықбек Тналиев.

Сондай-ақ, балаларға тәттілер мен арнайы сыйлықтар табысталды. Мерекелік дастарханда жайылды. «Мейірімді ана» қоғамдық қорының жетекшісі Динара Көктаубайдың айтуынша, бұл шара өңіріміздің басқа аудандарында да өткізілген.

- Жалпы Наурыз мерекесіне орай ұйымдастырылған шара Маңғыстау облысы бойынша өткізілді. Ақтау қаласымен қорытындыланды. Негізгі мақсат - балаларға көтеріңкі көңіл-күй сыйлау. Балаларымыз аман болсын!, - деді «Мейірімді ана» қоғамдық қорының жетекшісі Динара Көктаубай.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.