Ақтауда экобелсенділер бір реттік материалдарды пайдалануды азайтуға шақырды

Ақтауда өткен «Caspiy winter eco fest» фестивалінде экобелсенділер қала тұрғындары мен қонақтарына тазалық туралы үндеу жолдады, деп хабарлайды mangystaumedia.kz қала әкімдігінің баспасөз қызметіне сілтеме жасап.

Үндеу қала тұрғындары мен қонақтарына қоршаған ортаны қорғаудың маңыздылығын түсіндіруге бағытталған. Үндеуде экобелсенділер тұрғындарды қаланың санитарлық тазалығына бей-жай қарамауға шақырумен қатар, электр энергиясын тиімді пайдалану қажеттігін атап өтті. Сондай-ақ, экобелсенділер бір реттік материалдарды пайдалануды азайту және қалдықтарды қайта өңдеу бастамасын қолдау керегін айтты.

-Біз энергия тиімділігі мен су көзін үнемдеудің маңыздылығын мойындаймыз. Үй мен жұмыс орындарында энергия мен суды үнемдеуге, сондай-ақ қоршаған ортаға теріс әсерді азайту үшін баламалы энергия көздерін пайдалануды қолдауға міндеттенеміз. Біз сатып алған нәрселеріміздің қоршаған ортаға қандай әсері барын түсінеміз. Экологиялық таза және тұрақты тауарлардың пайдасына саналы таңдау жасауға міндеттенеміз. Біз бір реттік материалдарды пайдалануды азайту және қалдықтарды қайта өңдеу бастамаларын қолдаймыз. Қалдықтарды сұрыптау өте маңызды екенін мойындап, барлық адамды оларды сұрыптауға және тапсыруға шақырамыз. Біз көліктің тұрақты түрлерін дамыту қажеттігін мойындаймыз. Қоғамдық көліктерді, велосипедтерді пайдалануға және қауіпсіз жаяу жүргіншілер аймақтары мен велосипед жолдарын құру бастамаларын қолдауға міндеттенеміз. Қала тұрғындарын қоршаған ортаны және панасыз жануарларды қорғау жобалары мен науқандарына қатысуға шақырамыз және өзіміз де белсенді қатысуға дайынбыз, - деді тазалық туралы үндеуінде экобелсенділер.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.