20 шағынаудан тұрғыны «Маңғыстау облысы әкімдігінің» телеграм арнасында видеоүндеу жолдап, Ақкетік тұрғын үй кешенінің жанында автокөлік және жаяу жүргіншілер жолы жоқ екенін айтып шағымданды, деп хабарлайды mangystaumedia.kz сайты.
«Үйді пайдалануға бермей тұрып, құрылыс мекемесі жол салуы қажет қой. 20 шағынаудандағы Ақкетік тұрғын үй кешенінің жанында жол жоқ. Жол салу жұмыстарын ұйымдастыру – үлкен мәселе. Тұрғындар үй ғимаратының алдына көлігін ыңғайлы етіп қойып, шығып кеткісі келеді. Өрт бола қалған жағдайда мына үйлерге өрт сөндіру қызметкерлерінің көлігі кіре алмайды. Автотұрақ тағы жоқ. Әкімдіктегілер қайда қарап отыр, - дейді қала тұрғыны.
Құрылыс бөліміндегілер 20 шағынауданына инженерлік инфрақұрылымының құрылысын салу бойынша жоба жасақталып, қазіргі таңда мемлекеттік сараптамада қаралып жатқанын айтты.
- Сараптама қорытындысын биыл наурыз айында алу жоспарланып отыр. Сараптаманың оң қорытындысы алынған соң, бюджеттен тиісті қаражаты сұратылып құрылыс жұмыстары басталатын болады, - деп жауап берді Ақтау қалалық құрылыс бөлімі.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
