Бүгін Жаңаөзен қаласының әкімі М.Ибағаров сұйытылған газ бағасы мәселесіне байланысты қала тұрғындармен кездесті, - деп хабарлайды mangystaumedia.kz сайты Жаңаөзен қаласы әкімдігіне сілтеме жасап.
Жиын барысында Жаңаөзен қаласының әкімі сұйытылған газ бағасын тұрақтандыру мақсатында жасалған жедел шараларға жеке-жеке тоқталды.Атап айтқанда, жүйелі түрде сұйытылған газ сататын бекеттерге рейд ұйымдастырып, мониторинг жасалынып жатыр.
«Қазіргі таңда сұйытылған газ 27 бекетте сатылып жатыр. Оның 3-уі Қызылсай ауылында 55 теңгеден, қала, Рахат және Теңге ауылдарында газ бағасы 55 теңгеден, «Қазмұнайгаз» бекеттерінде 54 теңгеден, 3 –бекетте Электронды сату алаңы (ЭТП) арқылы 57 теңгеден сатылуда. Кезек жоқ», - деп мәлімдеді Жаңаөзен қаласы әкімдігінің баспасөз қызметі.
Сонымен қатар сұйытылған газдың бағасын бірқалыпты ұстау және негізсіз өсуіне жол бермеу мақсатында жеке кәсіпкерлермен бірнеше рет кездесулер ұйымдастырылды. Газдың бағасын тұрақтандыру мақсатында 7 қаңтар мен 1 наурызға дейін бөлінетін газ 30 пайызға ұлғайтылды.
Қала халқының сұйытылған газ бағасына байланысты қозғаған өзекті мәселелері дер кезінде орталық мемлекеттік органдарға жеткізілді.
Кездесудің соңында қала әкімі М.Ибағаров сұйытылған газдың бағасына байланысты мәселені жауапты орталық мемлекеттік органдармен келісіп шешу үшін азаматтық белсенділерден, жеке кәсіпкерлерден тұратын жұмысшы тобын құруды ұсынды.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
