Алғашқы отандық жүк кемесі Бакуге аттанды

Қазақстан мен Каспий маңы мемлекеттері арасында тұрақты фидерлік кеме қатынасы орнады. «Самұрық-Қазына» ұлттық әл-ауқат қоры» АҚ қолдауымен Ақтау теңіз портынан еліміздің алғашқы «Түркістан» фидерлік кемесі Баку портына жол тартты. Ел тарихында маңызы зор осы­нау шараға «Самұрық-­Қазы­на» ұлттық әл-­ауқат қоры» АҚ басқарма төрағасы Ахметжан Есімов, Маңғыстау облысының әкімі Ералы Тоғжанов, «Қазақстан темір жолы» АҚ басқарма төрағасы Сауат Мыңбаев және «ҚазМұнайГаз» АҚ басқарма төрағасы Алик Айдарбаев қатысты. Ақтау теңіз айлағынан астық толы контейнерлер тиелген «Түркістан» жүк кемесі Баку портына жол тартты. Бортына жиырма футтық 225 контей­нер артқан кеме Әзірбайжанға он алты тәулікте жүзіп барады. Жеткен соң контейнерлер платформаларға са­лынып, темір жол арқылы түрік порттарына, әрі қарай Еуропаға бағыт алады. Айта кетсек, фидерлік су көлігі аптасына бір рет сапарға шығып тұ­рады. Бір кемеге толық құрамды екі контейнерлік пойыз сыйдыру мүмкін­дігі бар. «Қазіргі таңда еліміздің көлік-­ло­гистикалық кластерінің қуатты да­муына қол жеткізетін көлемді бағ­дарламаны жүзеге асыруда табысты нәтижелер байқалуда. Бүгінгі фидерлік желінің ашылуы – осының айқын дәле­лі», – дейді «Самұрық-­Қазына» ұлттық әл­-ауқат қоры» АҚ басқарма төрағасы Ахметжан Есімов. Қазақ портына экспорт тауарлармен қатар Қытайдан Еуропаға шығатын транзиттік жүктер контейнермен ке­леді. Бұдан соң паромдармен жібері­леді. Енді бірден фидерлік кемеге тиеп, тасуға мүмкіндік туды. «Қытайдан басталған жүктер біздің елімізден өтіп, осы фидерлік кемемен Кавказ мемлекеттері, Түркияға, Қара теңіз маңайындағы Еуропа мемлекет­теріне барады. Сондықтан бұл – өте жақсы жоба», – дейді «Қазақстан те­мір жолы» ҰК» АҚ басқарма төрағасы Сауат Мыңбаев. «KTZ EXPRESS» АҚ басқарма төр­ағасы Дмитрий Абдуллаев контей­нерлік пойыздар құрамының тран­зиттік тасымалын он алты тәулікте орындау жоспарланғанын жеткізді. «Фидерлік тұрақты қатынастың орна­уы транскаспийлік көлік бағыты бо­йынша жүк тасымалының артуына оң ықпал етеді», – дейді Д.Абдуллаев. Фидер желісінің салтанатты ашылу шарасында Маңғыстау облысының әкімі Ералы Тоғжанов Ақтау портында жаңа жүйенің қосылуы аймақ үшін де, еліміз үшін де өте маңызды екенін айтып, қазақстандық теңіз индустрия­сын қарқынды дамытуға үлкен ықпал жасайтынын жеткізді. «Құрметті қонақтар мен бүгін­гі іс-­шараға қатысушылар! Ең алдымен, өңірімізге ат басын бұрып арнайы іссапармен келіп оты­рған Ахметжан Смағұлұлына, Сауат Мұха­метбайұлы мен Алик Серікұлына Маң­ғыстау облысындағы барлық бастамаларға қолдау көрсетіп жүргендеріңіз үшін алғыс білдіргім келеді. Киелі Маңғыстауға қош келдіңіздер! Біз облысымыздың экономи­касы мен көлік инфрақұрылымын дамы­туға жол ашатын тағы бір маңызды тарихи сәттің куәсі болып отырмыз. Жалпы Қазақстанның, соның ішінде Маңғыстау­дың инфрақұрылымын дамытудың негі­зін қалаушы тұңғыш Президент – Елбасы Нұрсұлтан Әбішұлы Назарбаевтың бастамасы бойынша 2,5 мың км жаңа темір жол және 12,5 мың км автожол салынды. Бұл Қытайдан Парсы шығанағы мен Еуропа елдеріне біздің порттар арқылы жүктерді тасымалдау нәтижесінде республиканың транзиттік әлеуетін тиімді пайдалануға мүмкіндік беріп отырғаны сөзсіз. Осы­ның арқасында, біз тәуелсіздік жылдары логистика саласындағы халықаралық қа­уымдастықтардың толыққанды мүшесі бол­дық», – деді Ералы Тоғжанов. Аймақ басшысы транскаспий бағыты Қа­зақстанның транзиттік дәліздерінің жүйесін толықтыратын аймақтағы еуразиялық кө­лік артерияларының маңызды буыны еке­нін айта келе, Каспий еліміздің транзиттік әлеуетін іске асыруда стратегиялық рөл атқаратынын атап кетті. Оның айтуынша, Маңғыстау өңірі теңіз инфрақұрылымын шоғырландыру және дамыту орталығы бола отырып, халықаралық-экономикалық ынты­ мақтастықты дамытуға елеулі үлес қосады. «Бүгінгі күнде Каспий порты жетілдіріл­ген және табысты қызмет атқарып отыр. Фидерлік жүйенің қосылуы транзиттік әле­ует пен трансқазақстандық дәліз қуаттылы­ғын арттыруға мүмкіндік береді. Фидерлік су кемесінің іске қосылуымен Ақтау порты арқылы жүк жөнелту көлемі 2018 жыл­ғы көрсеткіштермен салыстырғанда биыл 10%-ға, 2020 жылы 22%-­ға өседі. Порттың жалпы кірісі 2018 жылға қарағанда 2019 жылы 13%-­ға, 2020 жылы 40%-­ға арта түседі. «Нұрлы жол» бағдарламасын және Қазақстанның транзиттік стратегиясын дамыту нәтижесінде Ақтау портына кө­лемді транзиттік жүк тартуға мүмкіндік тудыратын транспорттық маршруттар өң­делді. Соңғы бес жылда Қазақстан тер­риториясы арқылы контейнерлік жүк легі 100 есеге артты. Біз бүгінгі маңызды оқиға облысымызға инвестиция көлемін арттыруға және келешекте еліміз бен өңіріміздің теңіз индустриясын қарқынды дамытуға үлкен ықпал жасайтынына сенімдіміз. Бүгінгі мүмкіндікті пайдалана отырып, осы жобаға басынан бастап қатысқан және оның жүзе­ге асырылуын қамтамасыз еткен барлық азаматтарға алғысымды білдіргім келеді. Баршаңызға жұмыста жаңа жетістіктер, бар­лық бастамаларға сәттілік және қойылған міндеттерді шешуде табыс тілеймін!» – деді облыс әкімі Е.Тоғжанов. Фидерлік су кемесін іске қосудың тиім­діліктері көп. Тарқата айтсақ, Ақтау порты арқылы жүк көлемі 50%­-ға көбейеді. Ше­телдік инвесторларды аймаққа тарту, Ақ­тау теңіз порты еркін экономикалық айма­ғындағы контейнерлерді өңдеу бойынша логистикалық хаб құру мүмкіндігі артады. Сонымен қатар жаңа сервистік қызмет­тер есебінен қосымша табыстар көлемі де өседі, жаңа жұмыс орындары құрылады. Қазақстан флотының дамуы, оның Каспий теңізіндегі тасымал жасаудағы үлесі артады. Контейнер жүктері көлемінің өсуімен негізгі капиталдағы инвестиция көлемі де көбейе түспек. 160 жаңа жұмыс орны ашылып, бюджетке қосымша салық түсімі де артады. Шара соңында фидерлік тұрақты кеме қа­тынасына жауапты ұлттық компания басшы­лары құрғақ жүктерді тасымалдаудың бас келісіміне қол қойды.

Жайық НАҒЫМАШ Суреттерді түсірген Серік МАЙЕМЕРОВ

[gallery td_select_gallery_slide="slide" ids="77787,77784,77788,77786,77785"]