Ақтаулықтар мәнерлеп сырғанаушы Денис Тенмен қоштасты

Ақтау халқы Қазақстан Республикасының мұзда мәнерлеп сырғанау шебері Денис Теннің құрметіне "Қош бол, чемпион!" атты еске алу шарасын өткізіп, қазақстандық мәнерлеп сырғанаушымен қоштасты.

Қала тұрғындары бүгін сағат 12.00-де "Ақтау" сауда үйіндегі мұзға сырғанау алаңына жиналып, Денистің суретіне гүл шоқтарын қойып, 1 минут үнсіздікпен еске алды. Қаладағы үздік мәнерлеп сырғанаушылар Дениске арнап мұзда өнер көрсетті.

https://www.youtube.com/watch?v=ueL88wb49Io

Ақтаулықтар кеше оқиға болған күні теңіз жағасындағы «I Love Aktau» инсталляциясының маңына жиналып, марқұм болған чемпионның рухына бағыштап шырақ жағып, гүл шоқтарын қойған еді.

Ақтау қаласы әкімдігі де өзінің инстаграм парақшасында Денис Теннiң қайтыс болуына байланысты ата-анасы мен жақындарына қайғырып кɵңiл айтты.

Әкімдіктің көңіл айту хабарламасында: "Денис елiмiзде мəнерлеп сырғанау спортын дамытуға үлкен үлес қосқан дара талант иесi едi. Оның жарқын бейнесi мəңгiлiк жүрегiмiзде сақталады", - делінген.

Естеріңізге сала кетейік, кеше Алматы қаласында Денис Тен пышақ жарақатымен ауыр жағдайда ауруханаға түсіп, дүниеден озған еді. Нұрсұлтан Назарбаев Денис Теннің қайтыс болуына байланысты туған-туысқандары мен жақындарына көңіл айту жеделхатын жолдады.  Денис Теннің өліміне байланысты күдікті ұсталып, олардың бірі қылмыс жасағанын мойындады.

Камшат ОҢҒАЛТАЙ,

Видео мен суреттерді түсірген Талант ҚҰСАЙЫН

[gallery td_select_gallery_slide="slide" ids="58233,58231,58230,58229,58232"]