Үш адамның өмірін жалмаған жол апатына қатысты сот үкімі шықты

©

Бейнеу аудандық сотында үш адам қаза тапқан жол-көлік апатына қатысты сот үкімі шығып, айыпталушы 5 жылға бостандығынан айырылды. Бұл туралы Бейнеу аудандық сотының баспасөз қызметі хабарлады.

Естеріңізге сала кетейік, 18 ақпан күні «Ақтау - Шетпе - Сайөтес - Бейнеу - Доссор» автожолының 449/353 шақырымында «Ман-19360» маркалы автокөлік пен «Тойота-Хайлюкс» маркалы автокөлік соқтығысқан болатын.

Жол-көлік апатының салдарынан «Тойота-Хайлюкс» көлігінің үш жолаушысы оқиға орнында қаза тауып, екі адам түрлі деңгейдегі жарақаттармен Бейнеу аудандық орталық ауруханасына жеткізілген еді.

Сотта «Ман-19360» маркалы автокөліктің жүргізуші көлікті орта дәрежедегі алкогольдік масаң күйде басқарғаны анықталды. Сотталушы К. есімді азамат Ақтау қаласынан Бейнеу селосы бағытындағы жолдың №449/353 шақырымында рөлді басқара алмай, жолдың қарама-қарсы жүріс бөлігіне шығып кетеді. Сөйтіп, «Тойота-Хайлюкс» көлігіне соғып, оның үш жолаушысы оқиға орнында есін жимастан қайтыс болған. Тағы бір жолаушысы жеңіл дене жарақатын алған.

Бейнеу аудандық сотында К-ге қатысты ҚР ҚК-нің 346-бабының 5-бөлігімен қылмыстық іс қаралды.

Бейнеу аудандық сотының баспасөз қызметінің мәлімдеуінше, сот үкімімен К. Қазақстан Республикасы  ҚК-нің 346-бабының 5-бөлімімен кінәлі деп танылып,  Қылмыстық Кодекстің 55-бабының 2,6-бөліктері  негізінде  оны 10 жылға көлік жүргізу құқынан айыра отырып, оған 5 жылға бас бостандығынан айыру жазасы тағайындалды.

Үкім заңды күшіне енген жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.