Күш – білімде!

Елбасы Н.Назарбаевтың биылғы ҚР Жолдауында білім беру мәселесіне кеңінен тоқталып өтті. Әрдайым басты назарда ұстанған білім саласы биыл да жаңа бағытымен жоспарға енді. Елбасы білім саласындағы өзгерістерге бейім жастарды тәрбиелеуді алға қойды. 2019 жылдың 1 қыркүйегіне дейін мектепке дейінгі білім беру ісінде балалардың өз бетінше оқып үйренуін, жаңа стандарттарға сай білім алуын жүзеге асыруды міндеттеді.

Осы мақсатта Мұнайлы ауданы, Басқұдық селосында «Арай-1» жекеменшік балабақшасында «Мектепке дейінгі ұйымдарда  «Тәй-тәй» технологиясын қолдану негіздері» тақырыбындағы аудандық семинар болып өтті.  Семинарға аудан бойынша мемлекеттік және жекеменшік балабақша әдіскерлері мен тәрбиешілері қатысып, өзара тәжірибе алмасты.

• «Адам ата-анадан туғанда есті болмайды: естіп, көріп, ұстап, татып ескерсе, дүниедегі жақсы, жаманды таниды дағы, сондайдан білгені, көргені көп болған адам білімді болады», – делінген Абай атамыздың он тоғызыншы қара сөзінде. Яғни, бүгінгі алып отырған «Мектепке дейінгі ұйымдарда  «Тәй-тәй» технологиясын қолдану негіздері» атты тақырыбымыз балалардың еркін ойлауына, ұжымдық жұмыс жасауына мүмкіндік береді. Балабақшамызда халық ауыз әдебиетіндегі ертегі, мақал – мәтел, жұмбақ – жаңылтпаштарды жиі қолдану арқылы баланың тілін, ақыл – ойын, қиялын дамытуды алғы мақсаттардың бірі ретінде қолданып жұмыс жасап жатырмыз, – деді Н. Новрузбаева.

Аталған семинарға жас мамандар мен ата-аналар қатысып, өз әсерлерімен бөлісті.

• «Арай-1» балабақшасына балам үш жасынан бастап келіп жүр. Биыл ересек тобында мектепке дейінгі білімін шыңдап, тәлім-тәрбие алуда. Балаларымыздың оқуға ынтасы зор. Өнер, шығармашылық жағынан да кенде қалмай, күн санап жан-жақты дамып, өсіп келеді.  Ұжым басшысына және барлық қызметкерлерге ата-аналар атынан алғыс білдіремін, –  деді ата-ана Л. Садуакасова.

Алғаш рет 2014 жылы Мектепке дейінгі ұйымдарда «Тәй – тәй» технологиясын қолдану негіздері» тақырыбындағы семинар «Арай» жекеменшік балабақшасында өткізілді. Биыл міне, біздің тәжірибемізде екінші рет өткізіп отырмыз. «Арай» жекеменшік балабақшасы 2011 ашылып, 2014 жылы «Арай-1» жекеменшік балабақшасымен кеңейді.

Жаңа ғимараттың бой көтеруімен қатар, балабақша топтар санымен жас мамандармен толықты. Осы аралықта балабақша ұжымы көптеген жетістіктерге қол жеткізіп, семинарлар мен курстарға қатысып біліктіліктерін арттырды. Сондай-ақ, балабақша тәрбиеленушілері де облыстық, аудандық байқаулардан жүлделі орындарға ие болып көз қуантып жүр. Қазіргі таңда балабақша тәрбиеленушілері ҚР жалпыға Білім беру стандартына сай білім алып қана қоймай, жаңа технология бойынша да өз білімдерін жетілдіріп, тәрбиеленуде.

   Анар Қалжан, «Арай-1» жекеменшік балабақшасының меңгерушісі

[gallery td_select_gallery_slide="slide" ids="48559,48558,48557"]