Ақтауда бизнес академия ашылды

Ақтауда балалар мен жасөспірімдерді көшбасшылыққа бағыттайтын «Unicum» бизнес академиясы ашылды, - деп хабарлайды mangystaumedia.kz сайты.

Мұнда балаларды мақсат қоюға, көп алдында сөз сөйлеуге үйретіп, қаржылық сауаттылықты арттырады. Сол арқылы бизнес бастауға бағыт-бағдар береді.

«Бүгінгі ашылып жатқан академияны «әлеуметтік жоба» ретінде қараймын. Себебі академия алдағы уақытта қаншама баланың болашағына әсер етеді. Олардың лаулап жануы үшін, өз қарым-қабілетін танып, көшбасшы болуына барлық жағдайды жасайды. Балаларға ерте жастан көшбасшылық қабілеттер мен жаңа жұмсақ дағдыларды үйретудің маңызы зор. Сонда ғана болашақта бәсекеге қабілетті жас қатары артады», - дейді Бибігүл Шайхиева.

Сонымен қатар мұнда тек баламен ғана емес, ата-анамен бірге жұмыс жүргізуді жоспарлап отыр. Кәсіпкердің айтуынша, алдағы уақытта ата-аналармен бірге түрлі тимбилдингтер, коучинг-тренинг, табиғат аясына саяхаттар ұйымдастырылады. Бұл ана мен баланы жақындастыруға, қарым-қатынасты одан әрі нығайтуға септігін тигізеді.

Кәсіпкер Дильбар Есенкелдинаның айтуынша, бизнес академияға 10 жастан 22 жасқа дейінгі жастар келе алады. Алғашқы күні сынамалы сабақ болады. Әрі қарай академияда оқу – ақылы.

"Балалар оқу барысында бизнес жоспар жасақтап шығады. Содан соң арнайы эксперт алдында бизнес жоспарды қорғап, оның орындалуы аясында жұмыс жүргізеді. Аймақтағы немесе республикалық деңгейдегі кәсіпкерлік нысандарды аралап, кәсіпкерлермен тәжірибе алмасады. Курс соңында оқушылар «Маңғыстау» сауда орталығында өз өнімін көпке ұсынуға мүмкіндік алады», - дейді инвестор, кәсіпкер Дильбар Есенкелдина.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.