Облыстық перинаталдық орталық жаңа құрылғымен толықты

Ақтауда облыстық перинаталдық орталыққа нәрестелердің шетінеуін азайтып, мүгедектігінің алдын алатын гипотермия аппараты табысталды, - деп хабарлайды mangystaumedia.kz сайты.

Аппарат «Самұрық-Қазына» АҚ компаниялар тобы атынан «Samruk-Kazyna Trust» қорының демеушілігімен берілді. Бұған дейін Талдықорған қаласындағы перинаталдық орталыққа тарту етілді. 2022 жылдың қараша айына дейін «Ayala» қайырымдылық қоры Орал, Өскемен және Шымкенттің перинаталдық орталықтарында гипотермияның аппараттық кешендерін орнатады. Енді, дүние есігін ашқанда тұншығып қалатын өмір иесіне тез арада араша түсу мүмкіндігі Қазақстанның барлық өңірінде мүмкін болады.

Терапиялық гипотермияны жаңа туған нәресте өмірінің алғашқы сағаттарында қолдану керек. Температураның нақты әсері қан ағымын реттеуге және нәрестелер миының жасушалары мен зардап шеккен аймақтарының қалпына келуін бақылауға мүмкіндік береді. Амплитудалық электроэнцефалография мониторы дәрігерлерге жаңа туған нәрестелерді құтқару және күту үшін қолданылатын терапияны бақылауға және тиімді реттеуге көмектеседі.

«Балалар өлімін төмендету мәселесі Маңғыстау облысы үшін әлі де өзекті болып отыр. Медициналық жабдық дәрігерлерімізге жаңа туған нәрестелерді құтқаруға, емдеуге және сауықтыруға көмектесетін болады. «Samruk-Kazyna Trust» және «Ayala» қорларына гипотермия аппараты мен электроэнцефалография мониторы үшін алғысымызды білдіреміз», - дейді облыстық перинаталдық орталықтың директоры Жапырақ Епенова.

Бұл медициналық мекеме 230 төсек-орынға есептелген және Маңғыстау облысындағы жүкті әйелдер мен жаңа туған нәрестелерге жан-жақты білікті медициналық көмек көрсететін жалғыз мекеме.

«Самұрық-Қазына» АҚ өзінің қайырымдылық қызметінде өңірлік жобаларға көп көңіл бөледі. Әсіресе, денсаулық сақтау саласындағы бастамалар ерекше қолдау табуда. Бүгін біздің өңірдегі перинаталдық орталық қажетті құрал-жабдықты алып, енді дәрігерлер дүние есігін ашқан нәрестелерге уақыт жоғалтпай, бірден Ақтау қаласында қол ұшын созатын болады», - деді «Қазпошта» АҚ Маңғыстау облыстық филиалының директоры Дариға Өтебалиева.

«Samruk-Kazyna Trust» және «Ayala» қорларының «Басқарылатын гипотермия» бірлескен жобасы, босану кезінде ауыр және орташа ауырлықтағы асфиксиямен туған балалардың өмірі мен денсаулығын құтқаруға көмектеседі. 2017 жылдан бастап Қазақстанның 9 қаласында орнатылған құрал-жабдық арқылы 213 нәресте құтқарылды.

«Біз балалар реанимациясын құрал-жабдықтармен және бала туғаннан мүгедектікті төмендетуге көмектесетін күту технологияларымен қамтамасыз етеміз. Жаңа туған нәрестені сақтап қалу өте маңызды. Гипотермияның аппараттық кешені нәрестенің миын сақтауға және гипоксияға байланысты қайтымсыз зақымданудан қорғауға көмектеседі», - деп атап өтті «Ayala» қайырымдылық қорының президенті Айдан Сүлейменова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.