Шетелдік тағылымдамадан өтуге байқау жарияланды, деп хабарлайды mangystaumedia.kz сайты.
«Бекен» жас көшбасшылар достастығы өңірде алғаш рет жас көшбасшыларға шетелдік тағылымдамадан өту мүмкіндігін беретін ең ауқымды байқау жариялайды.
Тағылымдама қатысушылары Грузия және Қырғызстан Республикасындағы ең үздік үкіметтік емес ұйымдары мен әлеуметтік кәсіпкерлік нысандарының қызметімен танысады.
Байқау талаптары: Маңғыстау облысында тұратын 18 бен 28 жас аралығындағы белсенді әрі көшбасшы жас болуы қажет, үміткердің қоғамдық қызметте тәжірибесі, жүзеге асырған әлеуметтік жобалары мен жеке жетістіктері болуы шарт, үміткердің жетекшілігінде белгілі бір бастамашыл топ немесе ұйым болуы керек, үміткердің шетелге шығуына мүмкіндігі мен төлқұжатының болуы шарт. Бір ұйымнан (топтан) бір жетекші ғана қатыса алады.
Жастар ұйымдарының жетекшілері, жастар ресурстық орталықтарының басшылары, волонтерлік топтар мен ұйымдардың жетекшілері, үкіметтік емес ұйымдардың жетекшілері, студенттік өзін-өзі басқару ұйымдарының көшбасшылары, жас мамандар кеңесінің төрағалары, саяси партиялар жанындағы жастар қанатының жетекшілері, қайырымдылық топтар мен қорлардың басшылары, әлеуметтік кәсіпкерлер, бастамашыл топтардың көшбасшылары тағылымдамадан өтуші бола алады.
Байқауға қатысуға өтінімдер 24 тамыз бен 4 қыркүйек 2022 жылы аралығында қабылданады. Тағылымдамадан өтуші үміткерлер www.mangystauzhastary.kz сайты арқылы байқау Ережесімен танысып, өтінімді электрондық нұсқада beken.zhastary@gmail.com электрондық поштасына ZIP файлы (барлық құжатты біріктіру арқылы) ретінде жіберуі тиіс.
4-7 қыркүйек аралығында іріктеудің алғашқы кезеңі, 7-10 қыркүйек екінші кезеңге өткен үміткерлердің конкурстық іріктеуі өтеді.
Қыркүйек айында конкурстық іріктеуден өткен 5 жеңімпаз Қырғызстан Республикасындағы тағылымдамадан өтеді. Қазан айында конкурстық іріктеуден өткен 5 жеңімпаз Грузия Республикасында тағылымдамадан өтеді.
Тағылымдамадан өтушілердің (тұру, тамақтану және жол) шығындары «Бекен» жас көшбасшылар достастығы» қоғамдық қоры есебінен жүргізіледі. Байқауға қатысуға қатысты барлық сұрақтар бойынша @beken_zhastary парақшасына жазыңыз немесе жоба менеджері 87087407370 хабарласыңыз.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
