ФЕЙК: Банктерде қарызы бар адамдарға несиелік рақымшылық жасалады

Желтоқсан айының 15-не дейін банктерге қарызы бар адамдар Ұлттық банк филиалдарына барып өтініш жазу керек деген ақпарат ”WhatsApp” мессенджері арқылы таратылып жатыр. Хабарламада кредитті уақытылы төлемегендерге несиелік рақымшылық жарияланады делінген.

Қаржы нарығын реттеу және дамыту агенттігінің Ақтау қаласындағы өңірлік өкілдер басқармасының басшысы Нұртас Машановтың айтуынша, аталған ақпарат шындыққа жанаспайды.

- Қазіргі уақытта екінші деңгейлі банктер кредиттерді өтеуге өтініш қабылдауды тоқтатты. 2021 жылдың басынан бастап 1 желтоқсанға дейін банктер қайта қаржыландыру бағдарламасы шеңберінде халықтың әлеуметтік осал топтарына жататын азаматтардың өтініштерін (ҚР «Тұрғын үй қатынастары туралы» заңының 68-бабына сәйкес) 2004-2009 жылдар аралығында теңгемен алынған ипотекалық тұрғын үй/ ипотекалық қарыздар және 2016 жылға дейін алынған валюталық ипотекалық тұрғын үй қарыздары бойынша ғана өтініштер қаралды. Екінші деңгейлі банктер берешекті өшіруден бас тартқан жағдайда қарыз алушылар ҚР Қаржы нарығын реттеу және дамыту агенттігінің Маңғыстау облысы әкімдігі жанынан құрылған арнайы комиссиясына Банктің несиені өтеуге арналған өтінішінен бас тартуының Бағдарлама талаптарына сәйкестігін қайта қарауға өтінім беруіне болатын еді. Айта кетсем, қайта қаржыландыру бағдарламасының талаптарына сәйкес келмейтін яғни, тұтынушылық (кепілсіз), автокредиттер, микрокредиттер сынды өзге де қарыздар аталған бағдарлама шеңберінде қарастырылмады. Қазіргі таңда тұрғындардың несиелері бойынша көмек көрсету үшін басқа бағдарламалар қарастырылмаған, - деді Нұртас Машанов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.